Croes: Grito di sector hotelero pasobra no por haya trahado pa traha

ORANJESTAD – Tin por lo menos un hotel na Aruba cu a bati na porta di gobierno (lesa: Minister Glenbert Croes) pasobra e hotel den cuestion no por haya trahado pa traha pa nan. Ta trata di e cadena di hotel Marriott cu a informa e mandatario e siman aki cu nan tin 60 vacatura cu nan no por yena. E mandatario e ora a active Departamento di Progreso Laboral (DPL) kende ta e departamento encarga cu intermediacion laboral entre Sector Priva y buscado di trabou. E mandatario a sigura cu ta motivando nos hendenan cu tabata riba FASE pa drenta bek nos mercado laboral. Por ta berdad cu e no ta e funcion cu bo ta desea, pero si cuminsa un caminda, por semper sigui crece den funcion dependiendo di bo propio iniciativa y dedicacion. “Ta hopi historianan di exito di tin cu mester ta nos inspiracion pa trece e cambio den nos bida cu nos ta desea. Nos no mester keda enfoca riba e porta cera. Nos mester dirigi nos miras riba tur e oportunidadnan nos dilanti” e mandatario a bisa. A conseha pa esunnan cu ta desea un trabou na Marriot, inscribi na DPL. Si nan no ta registra na DPL ainda, nan por registra via nan website www.dpl.aw .Click riba registracion y yena bo datonan pa por wordo inscribi como buscado di trabou. Si bo ta registra caba y ta interesa den un trabou na Marriot, manda un email na dpl.jobcenter@aruba.gov.aw.  E mandatario a compromete su mes di duna tur cooperacion na Marriot pa cumpli cu nan peticion pa ayudo y intervencion. “Nos lo cumpli cu Marriot pasobra Marriot na su turno tambe tin e responsabilidad di cumpli cu e demanda di duna nos turistanan, brindando e miho servicio posibel pa nan por regresa nan Pais bek cu un bunita recuerdo y experiencia di Aruba.”