Na Corsou Parlamento a aproba ley pa yega na tarifa pa pasahero “PSOC”

WILLEMSTAD - Parlamento den su totalidat ayera a aprobá e lei pa yega na e Passenger Security Over Charge òf tambe  e tarifa ku kada biahero pa nos isla lo mester paga. Ta trata di un suma di 4,50 florin.

Minister enkargá ku VVRP Charles Cooper a duna un splikashon dikon mester di e lei. E lei mester bin i mas pronto posibel pa asina por formulá di forma legal e tarifa di 4,50 florin ta kobra pasaheronan.

E lei ta un di e piesanan pa por yega finalmente na nos aviashon bai bèk na kategoria 1. E tarifa lo ta unu pa Kòrsou tambe por konta den mundu, pa nos airopuerto/aviashon ta di kalidat haltu i outomátikamente kumpli ku eksigensianan di ICAO i nos por yega kategoria 1 bèk.

Pa loke ta e fondonan minister Cooper a splika parlamentu, ku a base di artíkulo 6 di e lei aki, mesora un fondo mester wòrdu lantá ora e lei keda aprobá. Pa evitá ku e sèn no ta bai su destinashon. P’esei lo lanta un fondo i CAP ta kobra e tarifa i pone e montante pa gobièrnu i e suma ei ta bai riba e fondo indiká. CAP lo kobra un porsentahe di 1 òf 2% pa nan por hasi e trabou di kobransa pa gobièrnu.

Minister Cooper a splika ku nan a hasi nan kalkulashon a base di e kantidat di 820 mil pasahero pa aña i asina lo yega na 3,7 mion pa aña. E aña aki sinembargo ku e pandemia e lo ta ménos probablemente pero pa 2023 si e ta kere nan lo yega e kantidat ei.

E reunion públiko di ayera a kana na nivel, preguntanan dirigí i kontestanan alkaso. Ta basta ratu EXTRA no a eksperensiá un reunion di e forma aki.

Minister Cooper su palabranan tabata bon kla i e ta sigurá ku lo kana e proseso lihé pa asina Kòrsou por yega na kategoria 1 mas pronto posibel. NOTA: E texto ta scirbi den Papiamento fonetico di Corsou.