Na St. Maarten: Accion di firma contra libertad asesino di hobencita 38 aña pasa

PHILIPSBURG - Ruman di e hobensita Amy Velasquez asesiná di forma brutal na e isla di St. Maarten a start un akshon di firma pa e asesino di e hobensita aki no sali for di den prisòn. E echo aki a tuma lugá na 1984, esta 38 aña pasá.

Hustamente siman pasá djaweps korte superior na Kòrsou a trata libertat di e asesino Ashton Lake. Lake tin algun tempu kaba ku el a keda trasladá for di St. Maarten pa prisòn na Kòrsou pa resosialisashon di su libertat. Rapòrtnan ku a traha di Lake ta mustra ku e ta kla pa bai den komunidat.Djis despues di e kaso, ruman a start ku un akshon di firma pa entrega na korte pa no duna e hòmber aki su libertat. E famia ke yega na 5000 firma, i awor aki nan ta konta ku 3248 firma.E ruman a skirbi: “Ashton Lake brutalmente a violá, mata i despues tira mi ruman muhé den laman. Mi ruman tabatin 5 aña. Awor 38 aña despues e ta pidi su libertat. Pa 38 aña nunka e mal soño no a pasa den nos famia, nunka e dolor a pasa, dikon mester laga un hòmber ku a kaba bida di mi ruman liber. El a kaba ku mi ruman un dia promé ku el a hasi 6 aña. E no a mustra duele di loke el a hasi. Ami Jennifer Velasquez tabatin 14 aña e tempu ei, i for di e dia ei nunka mi ta mesun hende i nunka lo ta tampoko. Mi mama i tata a bira hendenan diferente. Un dolor inimaginabel. Tur hende riba e isla tabata kompletamente destruí. E mònster aki mester putri den prisòn te dia e muri, i no mester sali. P’esei e ta pidi tur hende pa firma e petishon kontra di libertat di Lake”. E ruman ta terminá bisando:”drumi dushi Amy, i nunka lo mi stòp di lucha pa bo”.Ashton Lake di Anguilla a keda kondená na bida largu, pa asesinato di hobensita na St. Maarten. El a sekuestrá e hobensita, viol’é kaba pone un blòki na su pia i tir’é na awa djis den serkania di su kas. Tur esaki pa motibu ku Lake tabatin problema ku famia di e víktima i kier a tuma vengansa.Lei ta permití pa despues di 20 aña sintando kastigu di bida largu, pa un tribunal revisá e aspekto ku si ainda e kastigu imponé tin sentido. Na 2020 Lake a hasi petishon pa revishon di su kastigu.Tres aña pasá Lake a bin Kòrsou p’e sigui proseso di resosialisashon p’e sali for di prisòn i rapòrtnan ku a traha di e trayekto ta positivo. Lake ta deseá pa regresá Anguilla serka su famianan.Tata di e víktima a sigui e kaso for di den sala di korte na St. Maarten via konferensia di video. E tata a bisa ku e morto di su yu muhé a kambia su bida kompletamente i te awe e ta sintié kibrá. E ta laga den man di hustisia pa tuma e desishon korekto. Pero e no ta esun ku lo pordoná Lake, pasó e no ta Dios. P’esei e nunka lo por pordon’é. Pa su parti, Lake putri den fièrnu, e tata a indiká. NOTA: E texto ta scirbi den Papiamento fonetico di Corsou.