Bermudez no a dicidi si ta acepta ainda

ORANJESTAD – Ainda e candidato mas visibel y logico pa reemplaza Juan David Yrausquin como minister, no a dicidi si e ta acepta e reto aki. Por lo menos, segun su declaracion na NoticiaCla den fin di siman aki. Cu retiro di Juan David Yrausquin como minister di finanza aproba pa parlamento, e caminda pa un minister nobo ta habri atrobe. Bermudez, cu dos siman atras a wordo nombra como ‘chief of staff’ di Yrausquin, a contesta NoticiaCla cu un ‘no’ riba e pregunta si e la dicidi caba. E no ta na Aruba actualmente y lo dicidi unabes cu e bolbe for di su biahe na Europa, otro siman.

Ora cu e crisis constitucional a inicia dos siman pasa, e asunto di retiro di Yrausquin a keda keto y a te hasta kere cu e lo no retira mas mirando con activo e tabata. Sinembargo un dia despues cu premier Mike Eman a stop su welga di hamber, parlamento a aproba e retiro di Yrausquin. Awor ta na gobernador pa firma esaki, locual ta un formalidad segun vice presidente di parlamento, Chris Dammers a bisa NoticiaCla.

Tur wowo, mesora a bolbe bay riba Bermudez, cu a keda keto tur e tempo aki. Y comprendible tambe despues di su ultimo declaracion den forma di primicia na NoticiaCa. E tempo ey e la mustra hopi cla cu aunke cu e no ta ansioso ni ambiciona pa e funcion, si haci apelacion pa e reemplaza Juan David Yrausquin como minister, e lo ta disponibel pero solamente como vakminister. Mes momento e ta bisa si cu no ta prudente e momento ey caba pa expresa nada otro cu e hecho cu e ‘ta asisti Yrausquin den loke ta parse di ta un crisis constitucional’. Awor cu e crisis ta ‘parse’ di ta yegando na su fin, y cu e retiro di Yrausquin ta confirma, e decision di Bermudez ta importante. NoticiaCla a confirma cu Bermudez ta e unico candidato cu ken premier Eman a papia cune, como posible reemplazo. E ta haci mencion di candidatonan, pero a referi solamente na un persona.

For di momento cu e rumornan a cuminsa core riba ken e candidato por ta pa eventualmente reemplaza Yrausquin, un di e nombernan cu mas a cay tabata Bermudez, y NoticiaCla tabata e prome cu a acerca doño di curpa. “E ta un opcion aworaki te ora bin un cambio” Bermudez a sigura NoticiaCla e tempo ey. Pero no ta asina cu e ta considera su mes un ‘front runner’ pa e funcion awor. “Been there, seen that, done that” Bermudez a contesta rapidamente, refiriendo na su periodo como minister den e prome gobierno di Aruba despues di a haya su Status Aparte. E tempo ey la ocupa e funcion di minister di Trafico y Comunicacion di februari 1987 pa maart 1989. Pues tin e experiencia y e conocemento amplio di con politica ta. “Mi no tin echt ambicion politico aworaki y mi no ta excita pa haye tampoco” Bermudez a sigui bisa. E la biba ultimo 20 aña de exterior y durante e periodo ey e no por a vota. De hecho e no ta ni forma parti di un partido politico na Aruba. Pero si haci un apelacion pe, ‘mi tey pa yuda te ora cu no mester di mi ayudo mas”. Prome cu Bermudez a bira e ‘Chief of Staff’ di Yrausquin, e tabata na cabes di e departamento di impuesto di islanan Bes, esta Bonaire, Saba y Statia. Prome cu esey, e la fungi como socio di Ernst & Young na Corsou y miembro di Raad van Advies, tambe na Corsou.