Van Trigt: E luna aki Corte ta trata apelacion di HAVA contra AZV

ORANJESTAD – Fin di e luna aki, asosacion di dokternan di cas (HAVA) ta hiba AZV corte ora cu e caso di apelacion wordo trata cu HAVA a entama. Asina e presidente dr Juaquin van Trigt a confirma den e programa Noticiacla LIVE diamars anochi. E caso ta pa logra cu dokternan di cas (mescos cu e lucha di e sindicatonan actual) por traha un ora menos, basa riba e recorte di 5.5% di salario cu a wordo impone riba nan aña pasa. 

E CASO

Tabata aña pasa ora cu HAVA a anuncia cu nan ta bay ‘den accion’ den forma di traha un ora menos pa dia, pa compensa pa e recorte di 5.5% di salario, cu AZV a hiba nan corte pa bringa esaki, argumentando cu ta violando e regla cu dokternan di cas tin cu traha un cierto cantidad di dia conforme e contracto cu AZV. AZV a gana e caso na tal instante, pa cual HAVA a dicidi di apela. E apelacion ta tuma lugar e luna aki. 

GARANTIA DI CUIDO

E 1 ora menos di trabou segun van Trigt, no ta nifica menos cuido di salud. E ta keda den margen di e contracto. E cuido lo no sufri ya cu lo keda duna e servicio cu ta rekeri di nan. Ta solamente cu ora di oficina lo bira menos, pero ora cu ta necesario, lo duna e asistencia necesario cu mester.