SETAR a haci denuncia pa e dos casonan di vandalismo di kabel di fiber optics

ORANJESTAD – E compania di telecomunicacion SETAR a entrega denuncia pa ambos caso di vandalismo contra sistema di fibreoptics. Asina Sector Manager di Asuntonan Comercial di SETAR, Ronica Lopez a confirma na noticiacla diamars mainta. Cu e denuncianan oficial, por cuminsa persigui esnan responsabel di e dañonan aki. Mientrastanto e daño na e di dos caso di vandalismo tambe a keda resolve.

E DI DOS CASO

Manera ta conoci, despues cu diabierna ultimo SETAR a experencia e prome caso di vandalismo na altura di rotonde di Sero Blanco, e compania a keda confronta cu un di dos caso di vandalismo, e biaha aki den area di hotelnan na Sasaki. Den fin di siman e daño a keda drecha. Pero dialuna atrobe, e biaha aki na un otro sitio, tabatin daño na kabelnan di fibre optics. E biaha aki e daño tabata menos, pero toch a impacta e sector di turismo na Palm Beach. Pero segun sra Lopez, ya pa alrededor di 1or di merdia tur cliente afecta den e area di Palm Beach a wordo lanta. “Ainda algun cliente afecta door di e sucedido na Seroe Blanco tin problema cu servicio. Esakinan tin nos atencion y nos tin techniconan dedica den e dianan aki pa solve tur esakinan” Lopez a sigura e portal aki.