Barco crucero Crystal Serenity toch no a haya permiso pa mara na Aruba

ORANJESTAD – Den fin di siman, autoridad portuario di Aruba a nenga e barco crucero di e compania Crystal Cruises, esta Crystal Serenity di mara na Aruba. Motibonan exacto ainda no ta conoci pa noticiacla, pero tabata conoci cu autoridad portuario a confirma na e portal aki anteriormente cu nan tabatin ‘problema’ pa e barco ‘parkeer’ pa algun luna manera inicialmente e compania a anuncia. E barco mester a mara dia 29 di januari ultimo y keda pa un bon tempo. 

SITUACION 

E compania financiero a encontra problema legal financiero recientemente pa cual mester a tuma decision pa cu 3 di su barconan cu tabata nabegando di cual 2 tabata den Caribe. A anuncia cu uno lo a mara na Aruba pa un periodo di algun luna. Pero Aruba tabata den negosacion cu e barco, debi na e noticia cu e barco kier a ‘parkeer’ e barco te cu dia 30 di April, pendiente e caso legal. E director di APA Marc Figaroa a confirma pa e portal aki recientemente cu nan no tabata mucho positivo pa e duracion ey y a bisa cu tabata ‘den negosacion’ intenso cu e compania. Na final awor, ta resulta cu e barco toch no a wordo permiti pa mara na Aruba manera cu inicialmente a wordo anuncia. 

NOTICIA NEGATIVO

Varios medio turistico dialuna a habri nan portal cu e noticia poniendo Aruba den un luz negativo pa e acto aki. ‘Aruba a nenga entrada;’ ta un di e cabesnan mas popular cu a core awe mainta riba rednan internacional di noticia. “Barco crucero bisa pa ‘bay’! y asina tin mas. E parti negativo ta cu ta menciona cu ‘no obstante cu tabatin garantia pa paga tur servicio delanta, y no tin risico pa beslag riba e barco’ toch a informa e barco diabierna atardi 4:30pm cu nan no ta haya permiso pa mara na Aruba.