“Miembro nobo” di unidad di cacho polis entrena pa droga

ORANJESTAD – Recientemente a keda presenta otro miembro nobo di "Honden Unit", cu ta un cacho di un diferente rasa di esnan cu tey caba. Esnan actual ta "Herder" mientras cu e adkisicion nobo ta un "cocker spaniel", cu ta un cacho chikito cu por wordo uza pa listra pa droga. E cacho aki den futuro, e mandatario a duna di conoce, por wordo uza den un centro ortopedagogico of na un scol pa percura di tene droga leu for di e institucionnan aki. E ta un tipo di cacho mas amabel cu esnan tradicional. "Esaki ta pasonan grandi den e direccion cu nos kier bay. E cacho aki como un contribucion na e team ta bay facilita nos cu e posibilidad pa no solamente haci e trabou mas miho y eficiente, pero tambe den forma mas "vriendelijk"," e mandatario encarga cu husticia, Arthur Dowers, a duna di conoce.