Gobernador di Aruba a promove teniente cu a bira su adjudant nobo

ORANJESTAD - Riba diaranson 26 di januari 2022 Gobernador di Aruba, S.E. Alfonso Boekhoudt, y e Comandante di Marinierskazerne Savaneta, LTKOLMARNS Art van Beekhuizen, a promove Luitenant der Mariniers Frank Plomp pa Kapitein der Mariniers. E promocion a tuma luga na Cas Ceremonial di Gobernador. 

E promocion di Kapitein der Mariniers Plomp ta coincidi cu e comienso di su funcion nobo como Adjudant di Gobernador di Aruba. Cu esaki e ta reemplasa Kapitein der Mariniers di Aruba, Mike Ligtvoet. Entrante 7 di februari 2022 e lo continua su carera como Deputy Commander ARUMIL na Marinierskazerne Savaneta. Den e funcion aki Kapitein Ligtvoet lo desempeña un rol den continuacion di e desaroyo di e Milisia Arubiano (ARUMIL), e ta encarga cu e planificacion logistico di e compagnie y tin maneho completo di e compagnie durante ausencia di e comandante.   

Kapitein der Mariniers Plomp a cuminsa su carera na 1987 como Marinier 1 Algemeen. Su carera ta caracterisa pa varios posicion, como tambe mision operativo den exterior. Ultimo añanan Frank Plomp a traha como Hoofd Opleidingseenheid na Mariniers Opleidingscentrum Rotterdam y e tawata envolvi den desaroyo di e Marinierskazerne nobo na Nieuw-Millingen. Tambe e tin algun aña di experencia cu Aruba, como cu durante di e periodo di 2011 te cu 2015 el a traha na Marinierskazerne Savaneta. 

Potret: © Kabinet Gouverneur Aruba