Periodista Elvis Weert dilanti huez awe pa violacion di menor

ORANJESTAD – Awe mainta 8:30am e conocido personalidad y periodista Elvis Weert (60) mester a presenta dilanti mesa berde pa responde pa e acusacionan contra dje di violacion di algun menor di edad. Den curso di dia noticiacla lo raporta riba desaroyo di e caso aki. 

KICO A PASA

Manera por corda, tabata na mei di aña pasa ora cu Weert a keda encarcela despues di a pasa den e prome dia di interogacion riba su sospecho di abuso sexual cu un menor. Atardi ora cu su tempo di interogacion a pasa, a detene, pone den boei y transporte pa un warda di polis pa su prome 2 dianan di encarcelacion. Weert   a keda deteni na su cas na Tanki Leendert, pa abuso sexual di menor (Art. 2.197, art. 2:200 jo. art. 2:210, art. 2:201 jo. art. 2:210 y art. 2:208 di nos codigo penal). Na dicho cas a confisca entre otro computer, laptop y telefon.

PASADO

Den pasado caba e persona aki a haya problema cu husticia ora cu e la wordo acusa di a agredi su pareha. E caso aki a pasa, y e persona a bay den libertad atrobe. E tabata periodista den pasado y tambe te na ultimo tabatin su programa tipo talkshow televisa 1 on 1, y tabata traha den departamento di Huurcomissie. NOTA: Como maneho di e portal aki, ora cu ta trata di personalidad conoci, politico of otro personanan publico, no ta tapa cara. Ora cu ta trata di personanan no publico, pero cu si a haya nan mes envolvi cu husticia, ta tapa cara. Ora cu e persona aki dado caso keda sentencia, ta kita e regla di tapa cara. Den pasado e portal aki a wordo hopi cuestiona pakico ta tapa cara pa cierto hende y otronan no. Y pakico ta publica potret y otro no. Si no ta publica potret, ta pasobra no tin potret di e persona pa publica.