Na Corsou, januari no a caba y ya tin 4 morto den trafico!

WILLEMSTAD - Sin ku e promé luna di aña a yega na su fin, ya kaba Kòrsou a konosé su di 4 morto den tráfiko. Segun informashon ofisial di polis, tur kos ta indiká ku ekseso di velosidat a hunga un ròl.

Ta trata di un aksidente di outo ku a tuma lugá entre dos vehíkulo nèt algu despues di 6 or di atardi riba Kaminda George Willems. Tabata un aksidente violento ku un di e outonan ku a kaba di bòltu riba su banda.

For di investigashon preliminar ku polis a realisá na e sitio, a sali na kla ku e vehíkulo den kua e dama víktima tabata kore, tabata bini for di Ronde Klip direkshon Brievengat. Den e último bògt riba Kaminda George Willems probablemente dor di velosidat haltu, el a pèrdè kontròl i bai dal kontra un otro vehíkulo ku tabata bini di direkshon kontrali. Dor di e impakto e vehíkulo a bòltu i e víktima su kabes a resultá bou di e vehíkulo. Personal di ambulans ku a presentá na e sitio no por a hasi nada mas pa e víktima ku a fayesé na e sitio mes.

E okupante di e otro vehíkulo, ku tambe a sufri herida, a keda transportá ku ambulans pa sala di emergensia di C.M.C.

Dòkter di polis a konstatá morto di e dama, shofùr di e vehíkulo ku a okashoná e choke. Polis te ku ayera no por a duna identidat di e víktima, teniendo na kuenta ku ainda no a logra informá famia. Nota: E articulo ta scirbi den Papiamento fonetico di Corsou.