Mayan hues ta sentencia Dino Bouterse na Merca

NEW YORK – Mayan un huez mericano na New York ta dicidi destino di e yiu homber di presidente di Surnam Desi Bouterse, esta Dino. E ta tende mayan si e ta haya castigo di bida largo den prison na Merca. E la sinta 18 luna di detencion preventivo, huez Shira Scheindlin por haci historia. Lo ta prome biaha cu yiu di un presidente actual di un pais, ta wordo sentencia na Merca. “Chuckie Taylor, yiu di ex presidente di Liberia, Charles Taylor ta prome cu Dino. Sinembargo pa ora cu e la wordo sentencia, su tata no tabata presidente mas.

CAMPO BOUTERSE

E campo Bouterse a teme e dia aki caba pa lunanan largo. Un sentencia lo ta un sla duro, tanto politico como priva, pa e tata Bouterse. E tata ta bringando pa un di dos termino como presidente. Pa oposicion, cu kier gana e eleccion na mei proximo, un castigo di prison ta un ‘regalo di shelo’.

DETENCION DINO

Un operacion clandestino di DEA na augustus 2013 a costa Dino su libertad. Despues di a biaha di Aruba pa Panama, e la wordo deteni na e pais Centro Americano y transporta pa Merca. E tempo ey tabata tempo di eleccion na Aruba unda cu a specula riba e bishita di Bouterse na Aruba, unda cu a tilda politico Glenbert Croes di ta amigo di Bouterse, pues tambe ta un figura dudoso. Asina kier a desacredita e politico net prome cu eleccion. Croes na e ocasion ey, a admiti cu Bouterse ta su amigo, pero esey no kier men cu e, esta Glenbert, ta meti den actonan dudoso di cual Bouterse tabata wordo culpa di dje. 

CASTIGO

Dino Bouterse a evita un caso den corte door di admiti culpabilidad aña pasa. E ta risca un sentencia di 15 aña pa bida largo. Si Bouterse no a admiti, su sentencia minimal lo tabata por lo menos 40 aña. NOTA: E foto ta uno di archivo unda cu Dino Bouterse(R) ta hunto cu su tata Desi, den un programa radial na Surnam.