Homenahe y tributo pa Roberto Geerman diasabra awor durante entiero

SAN NICOLAS – Colega di prensa y personalidad Roberto Geerman (DFM) lo haya un homenahe musical riba e dia cu ta dispidi di dje, esta diasabra awor. Durante un conferencia di prensa dialuna mainta, un comision forma pa e evento a anuncia e evento den forma di un tributo cu lo tuma entre 11’or di mainta te 2’or di atardi, pafor di Misa Theresita na San Nicolas, riba e pleintje. E intencion ta pa varios artista local riba peticion propio, duna un homenahe den forma di musica. 'E no ta un concierto, e no ta un celebracion, e no ta un carnaval, e ta un homenahe' ta loke a bisa specificamente pa evita cualkier confusion. Lo tin oportunidad di dispidi di Roberto via un drive thru, walk thru, cu ta sosode durante curso di mainta. Di parti di famia, a pidi si pa respeta nan privacidad y no saca potret di e momentonan di tristesa di e famia. Mas den siman, lo tin mas informacion concreto di e artistanan cu lo ta presente, y e programa completo. A compronde cu varios medio di comunicacion lo transmiti esaki en cadena durante esaki.