WEB: Director Oslin Boekhoudt no a wordo manda cas

ORANJESTAD – E director di WEB, Oslin Boekhoudt no a wordo suspendi. Esaki a keda confirma awe mainta pa e vocero di e compania Asja Dongen pa NoticiaCla.com. “E ta trahando normal” Dongen a sigui bisa. Asina e ta e desmenti e noticianan cu a circula henter fin di siman riba medionan social y algun corant, cu a bisa cu e lo a wordo suspendi y manda cas. Motibo di su suspencion, -segun e rumor-, ta relaciona cu e contracto di hedging y tambe e situacion financiero precario cu e compania ta aden actualmente. E compania no ta pasando den su miho momentonan aki, y ta pone cu rumornan manera esnan relata, a cuminsa core.

FEITENONDERZOEK

Manera ta conoci, WEB a laga un compania externo haci un ‘feitenonderzoek’ recientemente riba e contractonan di hedging, cu WEB a sera aña pasa pa 3 aña pa fuel oil. Mirando cu e no a beneficia Aruba ya cu prijs di fuel oil a baha drasticamente, e la hinca WEB den un situacion fastioso ya cu no por haci nada por lo pronto na e tarifa. Debi na e cuestionamento di esaki, a laga haci un investigacion riba con e contractnan aki a wordo traha etc. E rapport aki mientrastanto ta cla y lo keda trata e siman aki (diahuebs) den parlamento. Ta na e momento ey, lo bira conoci kico exactamente a sosode, y mas importante, kico lo por ta e conclusion di esaki.

SITUACION FINANCIERO

Tambe ta conoci cu e situacion financiero di e compania ta di tal formal cu e compania a para tur operacion extra y proyecto te proximo aviso. Avisonan tambe a wordo para pendiente un mehoracion di e situacion aki. Minister encarga cu utilidad Mike de Meza a confirma na NoticiaCla.com un tempo atras cu enberdad e compania ta ‘den rood’ (terminologia pa indica un situacion financiero malo , pero mes momento cu e no ta ‘precupante’. Mientrastanto cosnan lo a sigui empeora cu awor a pone paro na tur proyecto te ora cu tin un miho bista di e situacion.

MAS NOTICIA NEGATIVO

Fuera di esey, recientemente e compania a haye cu un otro noticia negativo, ora cu a keda confronta cu un leak di zeta cu a haci daño considerable na cierto partinan di rif den cercania. Y pa completa e obra, a bin haya varios pisca morto den cercania di e planta, unda cu ta saca awa. Esey tambe a pone cu WEB a cuminsa un otro investigacion pa haya sa e motibo. “E investigacion ainda ta andando y pues no a finalisa ainda” Dongen a contesta NoticiaCla.com awe mainta riba e asunto ey. Nota. E foto di Boekhoudt ta di archivo durante un reciente conferencia di prensa.