Compania crucero den problema financiero lo 'parkeer' su barco na Aruba

Compania crucero den problema financiero lo 'parkeer' su barco na Aruba

Posted on 01/21/2022 4:10 pm AST | Updated on 01/21/2022 4:12 pm AST

BERMUDA – E bapor crucero Crystal Serenity di e compania Crystal Cruises lo mara na Aruba fin di e luna, pendiente e futuro financiero di e compania. E compania crucero a declara publicamente cu e lo ‘parkeer’ na Aruba pa por lo menos 3 luna, mientras cu autoridad portuario di Aruba fuera di confirma pa noticiacla cu e barco lo ta biniendo berdad, a desmenti si tambe mesora cu e estadia no ta asina largo. E motibo di e bishita no programa di e barco, ta pasobra e compania madre tin problema financiero serio, pa cual a dicidi pa parkeer nan barconan na varios waf den Caribe. 

ARUBA

“Loke por bisa ta cu nos ta trahando hopi di cerca cu e agencia pa yegada Crystal na Aruba. Nan ta riba un voyage na e momentonan aki y ainda ta pending ainda kiko exactamente lo sosede” sr Figaroa a bisa e portal aki. “Den transcurso di e dianan venidero nos lo tin mas claridad”. Y ora cu a puntre riba e fecha cu e compania anuncia cu nan lo keda, esta 30 di April mas tarda, Figaroa a bisa: ”Si por confirma cu e barco no lo keda te cu 30 april na Aruba”. Ora cu a puntra sr Figaroa si e estadia di e barco, aunke no te dia 30 di April, lo ta uno largo, e la desmenti esey tambe. “Tampoco, te na e momentonan aki. Si e peticion ey bini mes, nos lo mester tene cuenta cu nos operacion”. Esey ta interesante mirando cu mientras cu lo no a haci e peticion ainda pa esey, segun Figaroa, e compania a anuncia publicamente si caba cu e fecha di permanencia ta te dia 30 di April proximo. 

E DECISION PA PARKEER BARCONAN

E compania publicamente a anuncia cu e decision di para nan operacion asinaki y parkeer nan barconan riba varios isla, tabata uno extremadamente dificil. “Pero e tabata uno prudente teniendo na cuenta e situacion comercial actual y e desaroyo reciente di nos compania madre Genting Hong Kong”, e presidente di Crystal Cruises Jack Anderson a bisa. Tabata diamars ultimo cu e compania madre a pidi corte di Bermuda pa proteccion di bancarota y pa por restructura e compania su debenan y pa asina e por a continua di cierto forma. Un dia despues sinembargo, e compania a indica cu nan lo a para mayoria di nan operacion. Y aki ta unda cu e compania crucero a opta pa para 3 di nan barconan y parkeer nan den varios waf. Y a scohe Aruba (cu no ta riba e itinerario di e crucero) pa mara pa un periodo ‘largo’, iniciando 30 di januari proximo. E bapor cu ta bin Aruba, ta conoci pa tin casino abordo, lo termina su crucero actual y despues mara na Aruba. E otronan, Crystal Symphony y Crystal Endeavor tambe lo mara fin di luna pero na otro wafnan asina nan termina nan crucero. 

 

 

  • Powered by SETAR