Ex minister ta dilanti huez prome siman di februari pa Caso Avestruz

ORANJESTAD – Aki dos siman y mei, pa ta exacto dia 7 di februari proximo pa 10'or di mainta, tur e sospechosonan di e caso penal Avestruz, incluyendo ex minister Benny Sevinger mester presenta dilanti mesa berde pa tratamento pro forma di e caso aki. Ta trata di (incluyendo Sevinger), un total di 11 persona cu mester defende nan mes pa nan actonan pa cual nan ta sospecha di dje. Despues di e dia ey, huez lo stipula un fecha definitivo pa e caso mes tuma lugar integralmente. Ta premira cu esaki por tuma lugar den e di tres cuartal di e aña aki. Pa loke ta e cargonan, ta sospecha Benny Sevinger di e.o. sobordo di un ambtenaar, falsificacion di firma y ta pertenece na un organisacion di crimen organisa. 

E CASO

Tabata aña pasa April ora cu despues di un ‘silencio’ di dos aña despues cu a haci entradanan hudicial na cas di varios sospechoso, cu detencionan a cuminsa cay den e caso aki. E prome cu a keda deteni tabata e dama R. Richardson, cu dia 11 di April 2021 a keda deteni. A sigui J. Franken dia 12 di April, y L. Richardson dia 13 di April. Despues di un break, a sigui mas detencion dia 19 di April ora cu a detene e pareha G. Werlemena y N. Nuñez. A sigui un break chikito pa despues dia 28 di April detene F. Abath, , sigui pa P. Sussebeek dia 5 di mei y F.Every dia 11 di e mesun luna. Detencionna no a stop y dia 19 di mei a detene M. Hsing. Finalmente dia 26 di mei, a pasa pa detene e sospechoso principal Benny Sevinger y su casa C.  

SEVINGER

Den e caso particular di Sevinger, mester bisa cu e tabata esun cu a keda deteni mas largo (mas cu 60 dia), mientras cu su casa a keda deteni 4 dia. Otro punto di observacion ta cu ta prome biaha cu un persona deteni pa un caso penal, a participa na un eleccion Parlamentario, y saca su mes cu voto preferencial. Despues cu e la recobra su libertad condicional, e la keda huramenta pa Gobernador, y por a asumi su funcion di parlamentario pa partido AVP. Esaki tabata posibel como cu no tin un ley cu ta prohibi esaki.