Na Corsou tur cama di ICU pa Covid19 ta yen desde ayera

WILLEMSTAD -  CMC (Curaçao Medical Center) a bati alarma ayera pa e situashon di pashèntnan di covid-19 interná. For di ayera tardi 2’or, tur 16 kama den e departamentu di Kuido Intensivo di COVID na Curaçao Medical Center ta yen.

Ayera tardi pa 4’or di atardi tabatin un total di 53 pashènt interná pa motibu di Covid.

Un enfermero di e departamentu a splika e situashon di e pashèntnan en general ku ta interná aktualmente den Kuido Intensivo. Sr. Jourmaine Juliao a splika ku kuido intensivo ta yen ku 16 pashènt i no tin lugá. E pashèntnan ku ta drenta awor aki nan situashon ta hopi malu. Hopi pashènt tin problema respiratorio, manera ántes tabata e kaso. Hopi ta intubá pues tin pipa den nan boka na mashin pa yuda nan hala rosea. Di e kantidat di 16 pashènt den Kuido Intensivo 5 so no ta na mashin di hala rosea ku pipa den nan boka. Esnan ku no ta na mashin ta drumi riba nan barika pa yuda nan hala rosea. Ora bai intubá hende, ta ora e hende mes no por hala rosea. “Pues bo tin problema ku oksígeno den bo kurpa òf problema ku e rosea mes”, segun sr. Juliao.

E momentu ei te enfermeronan ta tuma over i pone e hende na mashin. Ta pone e hende drumi ku remedi i pone e hende na mashin di rosea. Di e 16 pashèntnan den kuido ta 2 so ta vakuna.

E enfermero a hasi un komparashon di e pashèntnan awor aki, i esnan anterior tempu di Delta i sr. Juliao a bisa ku promé nan no ta mira hopi pashènt ta drenta tras di otro den Kuido Intensivo, pero awor aki si Kuido Intensivo ta yen.

E entrevista aki e enfermero i CMC a publiká trai mèrdia. Na momentu ku e sifranan di covid-19 pa dia a sali mas anochi, ta resultá ku e kantidat di pashènt interná ku covid-19 a subi na 54 di kual 17 ta den kuido intensivo. NOTA: E texto ta skirbi den Papiamento fonetico di Corsou.