Xander Bogaerts añadi riba wega di baseball virtual

ORANJESTAD – E compania Com2uS Corp cu ta produci weganan di baseball pa smartphone, a update su application, y ta inclui nos pelotero profesional Xander Bogaerts tambe den dje awor. E wega mes yama 9inninsProBaseball2014, y bo por download e pa bo smartphone. E intencion ta pa bo por hunga bo mesun weganan di baseball ‘a la grandes ligas’, usando ekipo y hungadornan existente di baseball profesional mericano. Y for di aña pasa a añadi e nomber di e pelotero profesional Xander Bogaerts den e wega. Cu esey, bo por ‘pretende’ di ta Xander Bogaerts y hunga e wega tambe riba bo telefon. Riba su mes e ta un bon propaganda pa nos pelotero profesional, y un otro señal cu e ta suficientemente importante pa wordo añadi riba tur plataforma di e wega, tanto real como virtual. NoticiaCla.com a añadi e muestra di unda Bogaerts ta aparece riba e wega, y con e por wordo hunga.

 BASEBALL REAL

Mientrastanto den baseball real, ayera NoticiaCla.com a raporta tambe cu e pelotero profesional arubano ta moviendo bon tambe. Xander Bogaerts a score grandi ayera den e partido di spring break contra New York Mets. E la dal un homerun, empuhando no menos cu 3 careda, y kibrando un empate di dos careda. Prome cu esey, e la empuha un otro careda. Na tur cuater careda. E no ta conta pa e temporada oficial cu ta inicia 4 di april proximo, pero e ta duna señal cu e hoben arubiano ta mustra bon pa e siguiente temporada. E ekipo a gana e partido tambe finalmente cu e score di 6-3. E gerente general Farrell a mustra cu e la mira diferencia cu Bogaerts. “E ta warda y tal bala di otro forma. E ta dal bala largo. E ta warda y dal ora cu e ta atras den conteo”. Segun e manager, Bogaerts ta mustra balansa y ta warda pa e bon balanan, enves di haci haragan y bay riba tur bala. Cosnan bon. NoticiaCla.com un biaha mas lo sigui Bogaerts di serca e temporada aki.