ORANJESTAD – Departamento di Impuesto ta anuncia cu e ultimo dia pa paga impuesto di vehiculo di motor di aña 2022 ta 31 di januari 2022. Pa e fecha aki tur contribuyente automobilista lo mester paga por lo menos mita di e impuesto anual. E contribuyentenan cu tin por ehempel plachi di nomber of brommer, lo mester paga e impuesto di aña 2022 completamente.
PLACH'I NUMBER
Departamento di Impuesto lo no bay otorga plachi di number nobo ni sticker pa aña 2022. Pues tur automobilista ta keda uza e plachinan cora cu blanco.
TARIFA DI IMPUESTO
E tarifa di impuesto di vehiculo di motor di aña 2022 ta keda igual cu e tarifa di aña 2021. Solamente si a cambia e vehiculo, esaki por causa un cambio di tarifa. E contribuyentenan cu no ta corda e suma di impuesto, por consulta e comprobante di registracion di e vehiculo di motor cu el a ricibi di Departamento di Impuesto ora el a registra su vehiculo. Por download e app ‘BO impuesto’ tambe pa haya sa e suma di impuesto cu mester paga.
COSTO DI E PLACHINAN
E contribuyentenan existente no tin mester di paga e costo di e plachinan, debi cu no tin plachi nobo pa aña 2022. E contribuyentenan nobo cu a caba di registra un auto y cu mester un number nobo, si mester paga e costo di e plachinan. E costo di e plachinan ta Afl.12 pa e plachinan grandi y Afl. 8 pa e plachinan chikito. Pa brommer e plachi ta costa Afl. 8.
HACI PAGO
Actualmente e oficina principal na Camacuri ta cera pa publico en conexion cu renobacion. Por haci pago online via banco, na MFA Noord, MFA Paradera, MFA Santa Cruz, MFA Paradera, MFA Savaneta of na e oficina situa den Postkantoor San Nicolas. Pa esnan cu ta haci pago na cualkier oficina di Departamento di Impuesto den districto, mester tene cuenta cu por paga unicamente cu debit card. Solamente e personanan no-comerciante di edad 60+ of esnan cu ta ricibi onderstand por paga nan impuesto cu cash of debit card na e oficina anexo na Camacuri (na unda cu ta busca plachi di number). Ta importante pa tene na cuenta cu no ta posibel pa paga e impuesto di aña 2022, si no a paga e impuesto di e aña(nan) anterior completamente.
PAGO VIA BANCO
Departamento di Impuesto ta recomenda pa haci pago online via Aruba Bank of Banco di Caribe, debi cu e transaccionnan di pago via e banconan aki ta pasa den e sistema di Departamento di Impuesto den un dia. Pagonan haci via otro banco ta tarda por lo menos 5 dia di trabou pa keda registra den e administracion di Departamento di Impuesto.
Pa e contribuyentenan cu ta paga online via banco, ta recomendabel pa haci uzo di e opcion "Bill Pay" y despues scoge “DIMP Motorrijtuigbelasting”. Mester menciona e persoonsnummer, e periodo di pago y e number di plachi por ehempel: 50001684-1e halfjaar 2022-A92789
Si e contribuyente ta bay paga mas cu 1 number via banco, e mester haci un transaccion di pago separa pa cada plachi di number. No ta posibel pa paga un solo suma den un solo transaccion, debi cu esaki lo trece tardansa ora di procesa y aloca e pago.
PIDI RECIBO DI PAGO ONLINE
Tur contribuyente cu haci pago via banco, por pidi e recibo di Departamento di Impuesto online via e link:
https://www.impuesto.aw/uw-digitale-formulieren-snel-en-gemakkelijk-online-invullen-en-verzenden
Despues ta scoge e opcion: Aanvraag kwitantie motorrijtuigbelasting. Departamento di Impuesto lo manda e recibo pa e contribuyente via e-mail.
BOET PA INCUMPLIMENTO
Pagonan cu drenta despues di dia 31 di januari 2022 ta laat. Pagonan haci riba dia 31 di januari 2022 depues di e “cut-off time” di banco lo pasa pa e siguiente dia y ta wordo considera como laat. Pa e “cut-off time” di cada banco por consulta nan website. Den caso cu un contribuyente ta laat e lo tin cu paga tambe e boet pa incumplimento. E suma di e boet ta 50% di e suma cu no a wordo paga.
Departamento di Impuesto ta recomenda pa haci e pago di impuesto mas lihe posibel y no warda te na ultimo momento. Pa mas informacion por consulta https://www.impuesto.aw/wanneer-moet-u- motorrijtuigbelasting-betalen
ORANJESTAD - Den e prome kwartaal di 2024, por spera cifranan prometedor y solido pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA ta raporta diahuebs. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’.
ORANJESTAD – Diahuebs 14 di maart, Minister di Turismo y Salud Publico Sr. Dangui Oduber a ricibi un invitacion pa bishita Aruba Boutique and Art Hotel cu lo habri nan porta dia 1 di April 2024. Un boutique hotel nobo den curason di Palm Beach cu lo forma parti como miembro di e marca Best Western Signature Collection.
ORANJESTAD – Diaranson mainta 27 di maart Prome Minister Evelyn Wever-Croes hunto cu colega Minister di Finansa Xiomara Maduro a biaha pa Corsou pa reunionan importante den cuadro di e tema di ENNIA.
MIAMI – E compania hotelero Four Seasons awor tambe ta sigui e trend di e compania Ritz-Carlton cu a inicia cu nan coleccion di yate luhoso estilo crucero. E compania a anuncia cu nan tambe ta drenta den e negoshi ey, di ‘espacio di crucero luhoso ultra chikito, cu su prome yate den construccion na Italia. E prome destinacionan ta conoci y ta pa Caribe, cuminsando na 2026. E temporada Caribense lo core di januari pa maart 2026 cu parada na St Barth, Nevis, the Grenadines, Saint Lucia, Barbados, Martinique, Curacao, Aruba y Guadeloupe. Cada bapor lo tin solamente 95 suites, cu ta 50% mas espacio pa persona cu cualkier otro crucero. Cada camber lo tin bentanan gigante di vloer te plafond, hopi vanidad den e bañonan y terras priva. Asina e presidente y CEO di Four Seasons Alejandro Reyna a sigura.
ORANJESTAD – CEO di Aruba Hotel & Tourism Association Tisa LaSorte, recientemente durante e programa Noticiacla LIVE a pidi pa hende na Aruba no bay protesta contra turista na Aruba riba e desaroyo di turismo. Den e video, e ta splica e peticion mas amplio.