SAN NICOLAS - Awenochi pa mas o menos 10:40 patruya di polis ta wordo dirigi cu maximo urgencia pa e bario di De Vuyst na San Nicolas pa un caso di hincamento.
Un persona masculino lo mester a hinca dos hende muher cu resultado cu un di nan a keda gravemente herida y su situacion ta critico.
E sospechoso lo a bandona e sitio pero den un forma rapido patruya ta logra localisa e sospechoso na altura di Rey Hing Supermarket na Pos Chiquito den su pick-up cora.
Den un manera tactico Polis ta detene e sospechoso y ta confisca un cuchui den e pick-up.
Dos ambulance ta wordo dirigi na e sitio di incidente cu maximo urgencia pa atende cu e victimanan. Personal di recherche San Nicolas, polis tecnico y slachtofferhulp a yega na e sitio pa asina cuminsa cu e investigacion. E caso aki ta den pleno desaroyo.
ORANJESTAD - Wardacosta ta informa doñonan di boto y seadoo pa tene cuenta pa nan tin nan documentonan valido a bordo cual ta, ‘vaarvergunning’ y ‘vaarbewijs’ di e capitán. Zorg pa tin vest di salbabida pa tur tripulacion y pasahero abordo; no por bai ku dimas pasahero abordo di e boto pa evita situacion peligroso.
ORANJESTAD - Diabierna anochi, radarnan a detecta movecion di un boto sospechoso den direccion di Aruba. A pidi e avion DASH di Wardacosta pa asisti pa verifica e contacto. Den ora nan di marduga di diasabra, 2 Metal Shark a sali pa asina topa cu un boto tipo 'Yola' cu un total di 9 persona indocumenta cu nacionalidad Venezolano abordo. Prome cu unidad nan a yega, persona nan riba e boto a logra di benta bultonan den awa, pero unidad nan di Wardacosta cu asistencia di e helicopter a recupera nan. Ta trata di mas o menos 850 kilo di cocaina i marihuana, cu a wordo confisca.
ORANJESTAD - Diasabra durante dia e team di Narcotica a hasi diferente entrada hudicial y tambe detencion. E team Narcotica ta trahando incansablemente pa combati e bendemento di droga diariamente. Ayera a detene e homber F. di 32 aña na ex United Dinner pa bendemento di droga. A confisca diferente droga entrenan cocaina, cocaina base, marihuana y tambe a haya municion. Tambe a haci entrada hudicial na Panamastraat. Eynan Team Narcotica a confisca cocaina y marihuana. Durante e accion di Team Narcotica a forma parti, e team di Aresto , Flex Team y Unidad di K-9. NOTA: E potret ta di archivo di noticiacla.com y no ta necesariamente uno actual durante e caso relata cu e articulo en cuestion.
ORANJESTAD - Diabierna mainta pa 06:55 central di polis a manda patruya pa e conocido di nan faam L. na su cas situa na Brazil cu lo a pone objetonan riba caminda pa stroba e trafico. Ta asina cu na yegada di patruya ta papia cune e homber L. pero e no ta rasonay na dado momento polis a bay pa detene e homber.