Alerta special di biento duro pa Aruba

ORANJESTAD - Servicio meteorologico di Aruba a emiti un alarma special di biento cu ta valido for di diamars te cu diaranson seis or (6’or) di atardi. Esaki ta nifica cu biento hopi fuerte cu posibel rafaga te cu 42 nudo por wordo experimenta, especialmente riba diamars. Biento cu promedio halto di 18 pa 24 nudo lo wordo sinti cu posibel rafaga entre 34 pa 42 nudo. E biento duro aki ta bin dor di un gradiente di presion grandi entre un area di presion abou banda di Colombia y un area di presion halto riba laman Atlantico. Esaki ta nifica cu usuarionan di lama mester tene cautela riba lama. Pueblo mester wak rond pa obhetonan los ta bon ancra, pa no bula rond. Usuarionan di lama, especial turista mester evita di bai mucho leu den lama, especialmente na noord y oost kust.