Proceso pa agilisa fluho na terminal mericano na aeropuerto a inicia

ORANJESTAD - Dentro di poco procesamento di pasahero y maleta saliendo for di e US Terminal na aeropeurto lo ta uno mas rapido y eficiente . Siman pasa, Minister Otmar Oduber a reuni cu e departamentonan mericano na aeropeurto cu e meta pa agilisa e proceso di pasahero pa cu pasahero y maleta. E departamentonan en cuestion tabata Custom and Border Protection (CBP), Transportation Security Administration (TSA), Aruba Airport Authority (AAA) y Departamento di Relacionnan Internacional. Mientras cu nada concreto no a wordo trata, a mas bien considera esaki un cortesia, 

Durante e reunion a papia riba diferente cambio cu lo bay tuma lugar pa loke ta trata e proceso di imigracion y duana mericano, cual lo ta na beneficio di efectividad y eficacia, unda cu e pasaheronan lo ta esunnan di mas beneficia. E proceso en cuestion ta e asina yama US Bound Pax Flow Improvement Project. Actualmente e fluho di pasahero tin un total di 14 stop y esun di maleta un total di entre 5 pa 7 stop. Entre e cambionan proponi pa mehora e fluho di pasahero por menciona e introduccion di e BIWIS System y e Radiation detection systems, Inline Screening di e maletanan, eliminacion di e baggage reclaim, eliminacion de e Secondary screening y e introduccion di e APCnan pa e screening di CBP di pasaheronan pa Merca. Cu e cambionan presenta e fluho di pasahero lo bay tin entre 7 pa 8 stop, es decir lo reduci esakinan te na mitad. Pa loke ta e fluho di maleta esaki lo wordo reduci te na 2 of 3 stop, cual ta un reduccion di mas di mitad compara cu lo cual tin na e momentonan aki.

E beneficionan cu nan ta spera di por haya cu e cambionan aki ta un aumento den e capacidad di procesa pasaheronan na e Central Screening, procesa esnan cu no ta wordo selecta mas eficientemente, e procesamento di CBP lo ta mas eficiente, entre otro. Intencion ta pa e cambionan pa e fluho di pasahero keda cla den aproximadamente 1 aña di tempo y esun di maleta den aproximadamente 1 aña y mey.