Mon Plaisir School ta cera pa tres dia debi na brote di Covid19

ORANJESTAD – Mon Plaisir Basis School lo cera scol pa 3 dia, cuminsando mayan, debi na un brote di Covid19 cu e scol ta experenciando. Den un carta na mayornan, cu noticiacla tin den su poder, ta splica cu e scol tin un brote unda cu tin mas di 100 caso di contagio, di cual 70 entre december 2021 y januar 2022. A splica cu desde cu scol a habri dia 10 di januari 2022, tur dia tin 4 pa 5 alumno cu ta contamina, y esaki ta sigui aumenta commo cu alumonan malo ta sigui bin scol y contagia otronan. Ademas tin docentenan cu tambe ta sea contagia na cas of den cuarentena. Awe so tabatin 4 docente malo na cas y mas di 10 alumno tambe na cas, malo. 

LIMPIESA

E scol mester cera pa 3 dia pa haci un limpiesa rigoroso, cu ta haci cu desde kleuter y 1 te 6 , lo no tin scol pa e tres dianan aki. A manda informa tur mayor y alumno cu ta spera e alumnonan bek na scol otro siman diaranson dia 26 di januari 2022.