BCA: E tasa di reserva obligatorio a subi na 13,0 porciento riba 1 di januari 2022

Posted on 01/18/2022 4:14 pm AST | Updated on 01/18/2022 4:23 pm AST

ORANJESTAD - Durante e reunion di 10 di december 2021 y despues di a revisa dato economico y monetario mas recien, e Comite di Maneho Monetario (CMM) di Banco Central di Aruba (BCA) a dicidi pa hisa e tasa di reserva obligatorio di 12,0 porciento pa 13,0 porciento entrante 1 di januari 2022. E decision aki ta basa primordialmente riba e nivel halto di likides excesivo na e banconan comercial.

A considera e siguiente informacion y analisis pa yega na e decision aki:

RESERVANAN INTERNACIONAL

E reservanan internacional (incluyendo e diferencia di revaluacion di oro y reserva di divisa) a aumenta cu Afl. 561,5 miyon, te cu y incluyendo 19 di november 2021, compara cu fin di december 2020. E aumento notabel den e reservanan internacional tabata debi principalmente na entradanan relata na turismo y fiansa di gobierno Hulandes na gobierno di Aruba pa mehora su posicion di likides. Mientrastanto, reservanan oficial di divisa a nota un subida di Afl. 330,7 miyon. Consecuentemente, e reservanan oficial y e reservanan internacional a yega te na, respectivamente, Afl. 2.538,6 miyon y Afl. 2.918,1 miyon riba 19 di november 2021 (Grafico 1).

Grafico 1 – Desaroyo den reservanan oficial y internacional.

Di e manera aki e reservanan a keda na un nivel adecua ora di compara nan cu e nivel critico di pagonan relaciona cu e cuenta coriente di e balansa di pago y e metrico di ARA di IMF (Tabel 1).

DESAROYONAN DEN CREDITO

Durante oktober 2021, credito total den e sector bancario a baha cu Afl. 88,9 miyon of 2,2 porciento te na Afl. 3.875,2 miyon, compara cu fin di 2020. Esaki tabata debi na e componentenan ‘credito na empresa’ (-Afl. 46,9 miyon of -3,1 porciento) y ‘credito na individuo’ (-Afl. 25,0 miyon of -1,3 porciento). E categoria ‘credito na individuo’ a cay pa motibo di un demanda mas abou pa credito na consumidor, mientras cu e componente ‘credito na empresa’ a wordo impacta principalmente door di menos fiansa riba cuenta coriente.

INFLACION

Na october 2021, e Indice di Prijs di Consumo (CPI) tabata 2,4 porciento mas halto compara cu e mesun luna di e aña anterior. E promedio anual di e tasa di inflacion a alcansa -0,3 porciento na oktober 2021, 0,4 porciento mas halto cu e luna anterior (Grafico 2) . E subida den CPI compara cu e aña anterior tabata primordialmente door di crecemento den prijs den e componentenan di ‘transporte’ y ‘mobilario’. E promer tabata relata na e crecemento den prijs di petroleo cu a resulta den un aumento den prijs di gasolin, mientras cu e ultimo probablemente lo tabata relata na e escasez global di suministro.

Grafico 2 - Inflacion

Likides di banconan comercial

E total di likides excesivo na banconan comercial a subi te na Afl. 1.295,8 miyon na oktober 2021, compara cu Afl. 1.107,4 miyon na december 2020 (Grafico 3).

Grafico 3 – Desaroyo den likides excesivo

Apesar di esaki, un comparacion mensual a mustra cu e total di likides excesivo a baha di Afl. 1.308,3 miyon na september 2021 te na Afl. 1.295,8 miyon na oktober 2021. E caida aki ta debi na e subida den e tasa di reserva obligatorio di 9,0 porciento na 10,0 porciento desde 1 di oktober 2021. Sinembargo, e crecemento den e tasa di reserva obligatorio a wordo mitiga pa un expansion den e nivel total di fondonan di likides na e banconan comercial. Consecuentemente, e nivel di likides excesivo a keda halto y significantemente riba e nivel prome cu e pandemia.

E nivel amplio di likides excesivo ta parcialmente causa pa e bahada den e tasa di reserva obligatorio y e asina yama “prudential liquidity ratio” minimo entrante maart y april 2020, formando parti di e medidanan di alivio riba tereno monetario y prudencial pa asina mitiga e efectonan di e pandemia di COVID-19. Ademas, e falta continuo di demanda pa credito ta un factor adicional cu a contribui na e crecemento den likides excesivo di e banconan comercial, mescos cu probablemente e aporte di FASE y subsidio di salario duna door di gobierno di Aruba pa mitiga e efectonan economico di e crisis relata na COVID-19.

Consecuentemente, e asina yama “prudential liquidity ratio” di e banconan comercial, cual ta midi e porcentahe di activo likido compara cu e activo total netto di e banconan comercial, a keda na un nivel comfortabel di 38.4 porciento den oktober 2021, basta mas halto cu e asina yama “prudential liquidity ratio” minimo rekeri di 18,0 porciento.

Anticipacion di salida di divisas a consecuencia di e revocacion di medidanan riba divisa di BCA

Apesar cu e nivel di reservanan oficial y internacional ta adecua, BCA ta anticipa un crecemento den e salida di divisa como resultado di e revocacion completo entrante 1 di september 2021 di e restriccionnan introduci cu tabata relata na COVID-19. Calculacion reciente ta mustra un salida di Afl. 260,0 miyon durante fin di 2021.

Travel& Leisure: Aruba ta top lista di 10 resortnan all-inclusive den Caribe
ORANJESTAD – Danki na un di e hotelnan all-inclusive na Aruba, nos isla ta na prome lugar di e top 10 di miho All-inclusive resorts pa famia den Caribe. Por lo menos segun e portal Travel & Leisure. Ta trata di e resort Tamarijn Aruba. Segun e articulo en cuestion, loke ta haci e diferencia den e destinacionan Caribense, ‘ta e abundancia di resortnan increibel all-inclusive’. E ta un forma perfecto pa famia por disfruta. Y ta describi tur e loke e turista por goza di dje. Mester bisa cu e resultado di e top 10 ta basa riba experiencia personal di e escritor di e portal turistico.
Mas Economia
Lesa Mas
KVK: Mayoria compania ta pensa cu e scarsedad di trahado lo empeora
ORANJESTAD – Mayoria compania ta pensa cu e scarsedad di trahado na Aruba lo empeora. Asina Camara di Comercio ta raporta diaranson.
Mas Economia
Lesa Mas
Mas turista Colombiano ta biahando pa Corsou envez di Aruba den 2024
BOGOTA – Mas turista Colombiano a bay Corsou envez di Aruba. Asina presidente ehecutivo di Asociación Colombiana de Agencias de Viajes y Turismo, (ANATO), Paula Cortés Calle ta raporta segun un raportahe di e portal Colombiano El Nuevo Siglo ta raporta. Mientras cu paisnan manera Merca, Spaña, Panama y Republica Dominicano ta conta pa 69% di e Colombianonan cu ta biaha pa exterior, e pais cu mas crecemento ta Corsou cu 157% di participacion, compara cu Aruba cu tin ‘apenas’ 63%. Hasta Hulanda tin mas trafico di Colombia, na 81%. Pero ta sigui Aruba cu 47% y Panama cu 44%. Segun ANATO, e prome trimester di 2024, 1.345.687 Colombiano a biaha pa exterior, cu ta un aumento di 13%, compara cu e mesun periodo aña pasa. “E resultadonan positivo aki ta refleha e recuperacion di turismo saliente, cu ta beneficia e industria relaciona, den e area, hotel y restaurant, entre otro” Cortés Calle a finalisa bisando.
Mas Economia
Lesa Mas
Pa aña 2024 y 2025, ATIA lo enfoca mas riba e tema laboral
ORANJESTAD - Diabierna 19 di april 2024, Aruba Trade and Industry Association (ATIA) a tene su reuniun general di miembrecia den e sala di conferencia di ATIA.
Mas Economia
Lesa Mas
Aruba Bank ta presenta un serie di entrevista cu su Mortgage Advisors – “Caweta di Hipoteca”
(ADVERTORIAL)
Mas Economia
Lesa Mas
A.T.A: Turismo ‘stayover’ pa Aruba a crece cu mas di 25% den maart 2024
ORANJESTAD - Den e prome kwartaal di 2024, a conta cu cifranan prometedor pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA, a bisa den un comunicado. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’. E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi. Capacidad di carga tambe ta sigui ricibi atencion di parti di A.T.A. di diferente manera.
Mas Economia
Lesa Mas