- Joran vd Sloot a dicidi di bringa su extradicion pa Merca toch!
- Opinion: Reaccion di Vacation Rental Professionals Aruba riba e informe huurmento di casnan vacacional y capacidad di carga
- Fluho di biento di oost te zuidoost lo pone tempo bira mas calor
- Total Services Aruba a disculpa pa saco di sushi tira den area di Barcadera
- Premier Wever personalmente no por compronde pakico Hulanda no kier duna kwijtschelding na Aruba
ATA: Aruba ta ricibi 806.555 bishitante “stayover” na 2021
ORANJESTAD – Aruba Tourism Authority (ATA) ta informa cu pa luna di december nos destinacion a ricibi un total di 89.541 bishitante “stay-over”. Si compara luna di december 2021 cu december 2019 - cu tabata e ultimo aña normal di turismo, por mira cu Aruba a recupera cu 88.9% di locual a wordo ricibi na december 2019.
Por observa cu tres mercado a destaca den e cantidad di turista cu a bishita na december 2021, esta Estadonan Uni di Merca cu 67.525 bishitante, Canada cu 5.293 bishitante y Hulanda cu 4.555 bishitante. E di cuater mercado mas grandi tabata Colombia cu 3.654 bishitante.
Pa e periodo januari 1, 2021 – december 31, 2021, Aruba a ricibi un total di 806.555 bishitante. Aruba ta wordo representa na tres diferente continente. Norte America ta e mercado mas fuerte y entre januari pa december 2021 un total di 690.246 bishitante Norte Americano a bishita Aruba. Esaki ta 85.6% di e total di nos turistanan. Durante e mesun temporada, Europa a trece 53.698 turista pa Aruba, cu ta 6.7% di e total di bishitante. Un total di 39.870 turista cu ta representa 4.9% tabata procedente di Latino America; y 2.8% - cu ta 22.741 bishitante, a bishita nos isla for di otro partinan di mundo.
Un biaha mas por mira cu e mercado di Hulanda ta mustrando un crecemento cu ta surpasa e cifranan di 2019. December ta e di seis luna consecutivo cu Aruba a ricibi mas turista di estadia for di Hulanda. Compara cu 2019 por observa e siguiente porcentahenan di crecemento: 39% (juli), 34% (augustus), 27% (september), 23% (oktober), november 18% y pa december 28%.
Remarcabel ta tambe cu pa ocho luna caba, for di mei te cu november 2021, e yegada di turistanan for di Estadonan Uni di Merca no ta baha bao di 90% di e cifranan di 2019. Esaki ta un di e cifranan cu sigur ta refleha un recuperacion stabil y continuo di e mercado mas grandi y importante di nos industria di turismo.
Aña 2021: 72% recuperacion
Aña 2021 a pone e “tono” pa y a marca e cuminsamento di un etapa continuo di recuperacion di e pilar mas importante di Aruba su economia.
Den su totalidad, e cifranan di e periodo di januari 1, 2021 – december 31, 2021, ta mustra cu Aruba a conoce un recuperacion cu a cuminsa cu apenas 33% na januari, pero a acelera ya na april y a yega riba di 80% na mei. For di luna di mei te cu ceramento di aña, apesar di tur situacion cu a presenta, e porcentage di recuperacion no a baha di 80% mensual.
Teniendo na cuenta cu tabatin varios reto serio den 2021, asina mes a logra mantene e recuperacion y cera aña cu un grado di recuperacion di 72%, compara cu e cifranan di 2019.
No tabata facil y a tuma hopi esfuerso di parti di Aruba Tourism Authority y henter e industria di turismo, localmente e internacionalmente, pa mitiga e efectonan di e desaroyonan menos positivo pa surpasa e retonan cu a presenta na 2021.
A cuminsa aña 2021 cu un proyeccion un tiki reserva ainda, pero Aruba su reputacion y promocion fuerte, y imagen como un isla sigur y cu bon protocol pa cuida tanto e residente como e bishitante, a logra mitiga e efectonan di cancelacionnan di reservacionnan y a adapta na nan.
Algun di e retonan tabata: e subida di cifranan di contagio cu entrada di e variante Delta y despues e variante extra-contagioso Omicron, cancelacionnan ora cu Estadonan Uni di Merca a declara Aruba como un pais “Level 4”, y e diferente cambionan grandi den protocolnan di re-admision di parti di varios pais pa ora e turistanan bolbe nan pais di origen.
“Un grado di recuperacion di 72% ta un resultado fabuloso pa nos destinacion, considerando e impacto di e pandemia riba biahamento mundialmente y teniendo na cuenta e retonan multiple cu a presenta en general,” Ronella Croes, CEO di A.T.A. a expresa. “Cada mercado tin su retonan actualmente, uno mas impactante cu e otro; y ta depende con diferente factor ta alinea pa logra atrae turistanan pa nos isla. Aruba a logra yega na un pakete di protocol, condicionnan y, hasta un App y un seguro special cu mester a crea for di “scratch” den un tempo relativamente cortico. Awe nos ta wak e resultadonan positivo y optimista di e iniciativanan tuma, di e forma progresivo y proactivo di pensa y actua, trahando cu teamnan multi-disciplinario.”
Na December 2021 a perde 12% di grado di recuperacion proyecta pa e luna versus 2019, y na luna di Januari ta proyecta cu lo por perde 25% di cantidad di bishitante compara cu locual a proyecta pa e luna. Esaki tur debi na Omicron. Ta confia cu lo re-inisia e trayecto di recuperacion despues di e ola actual, aunke cu grupo nan di biahe incentivo cu a cancela, a postpone pa 2023 bai dilanti y pues lo ta dificil pa recupera e parti di negoshi aki.
TURISMO CRUCERO
Na juni 2021 Aruba a habri atrobe pa ricibi turismo crucero y na december 2021 un total di 48.209 pasahero crucero a bishita nos isla cu 35 bishita di barco. Turismo crucero ta siguiendo un proceso di recuperacion gradual. Di juni pa december 2021, Aruba a yama bonbini na un total di 136.211 pasahero crucero, cu a bishita nos isla riba un total di 96 bishita di diferente barco den e periodo aki.
Poco poco nos industria di turismo lo “normalisa” cu ahustacionnan, teniendo e siguridad di e bishitantenan como tambe nos localnan na prome luga.
TOURISM CREDITS / CENTRAL BANK OF ARUBA
Di acuerdo cu Banco Central e asina yama ‘Tourism Credits’ (cual anteriormente tabata wordo yama “Tourism Receipts”) pa e prome y di dos kwartaal di aña 2021 a contribui cu AWG 1279.1 miyon den nos economia, cu ta 9% menos compara cu e mesun temporada na 2020. Esaki naturalmente ta debi na e pandemia global di Covid-19 durante cual Aruba tambe a cera su fronteranan temporalmente entre mita di maart 2020 te cu juli 2020.
Aruba ta sigui recupera desde e re-apertura di nos frontera na juli 2020. E desaroyo y progreso di recuperacion di Aruba su industria principal ta sigui surpasa expectativanan. No obstante dificultadnan awor, tin e confiansa cu lo re-inisia nos trayecto di recuperacion despues di e ola actual.
Opinion: Reaccion di Vacation Rental Professionals Aruba riba e informe huurmento di casnan vacacional y capacidad di carga
IMF: Economia di Aruba a bounce bek fuerte pero debe publico ta sigui halto
WASHINGTON – E actividadnan economico (di Aruba) a bounce bek fuerte mientras cu e efecto di pandemia a mengua. Tambe e balansa fiscal a mehora pero e debe publico ta sigui halto. Asina e ekipo di Fondo Monetario Internacional (IMF) a publica den nan asina yama declaracion di conclusion di e mision dialuna (awe), lidera pa miembro di e ekipo di IMF Takuji Komatsuzaki. E ekipo a bishita Aruba recientement entre 22 di mei pa 2 di juni, y awe a pubklica nan conclusion. Gobierno di Aruba dialuna mesora a opta pa desvia di nan temanan original di conferencia, pa asina por a adresa e tema di IMF a cambio. Nan a saca nan propio comntario di e relato di IMF tambe despues.
Prome barco di Venezuela ta yega Aruba dialuna cu 40 tonelada di producto
PARAGUANA – E prome 2 barconan di Paraguana, lo yega Aruba dialuna cu 40 tonelada di fruta, como e prome cargamento desde cu frontera cu Venezuela a habri luna pasa. Contrario na Corsou, no tin limitacion di loke por trece Aruba desde Venezuela. Entre e productonan tin banana, mango, tomati, guayaba, lamunchi. Tambe tin lechuga, awacati y mucho mas.
DIMP ta cla pa atende masalmente cu e cartanan di obhecion
ORANJESTAD – Despues di a logra completa e procesamento masal di e cobransanan di inkomstenbelasting di aña 2021, cu por wordo considera un logro importante despues di mas di 40 aña di atraso, awor Departamento di Impuesto (DIMP) ta cla pa enfoca riba e cartanan di obhecion.
DIMP ta raporta logro grandi completando restitucion masal di inkomstenbelasting 2021
ORANJESTAD – Diabierna Departamento di Impuessto, (DIMP) a raporta loke nan ta considera un logro grandi y historico pa Aruba, door di complete e restitucion masal di inkomstenbelasting pa 2021. Segun e comunicado, ta pa mas cu 40 aña cu Departamento di Impuesto ta trahando cu atraso den procesamento di cobransa di inkomstenbelasting y primanan social manera AOV/AWW y AZV. Segun DIMP, den e luna di mei 2023 nan a logra elimina e atraso den procesamento di cobransa masal y pa prome bes den historia a logra hinca e datonan di e declaracion di inkomstenbelasting 2021 den sistema, den apenas 5 luna despues di e fecha final di entregamento (5 december 2022). Departamento di Impuesto a paga en total 27,9 miyon florin na restitucion di inkomstenbelasting den aña 2022 y 7,9 miyon florin na restitucion di inkomstenbelasting den e prome kwartaal di aña 2023.
Hotelnan di cadena RIU na Aruba a gana premio di TripAdvisor
PALM BEACH – Di un total di 61 hotel di e cadena RIU na mundo, Aruba tambe a logra un premio di e Plataforma mundial turistico Trip Advisor. Asina e portal di e grupo hotelero TUI Group ta raporta. Un total di 61 RIU den 16 pais a keda honra e biaha aki. Y pa Aruba a toca e hotelnan na Aruba, Riu Palace Antias cu a bay cu e premio aki. E otro paisnan cu a logra e premio, tabataCabo Verde (4), Republica Dominicana (1), Alemania (1),Iranda (1), Jamaica (5), Maldives (2), Mexico (11), Morocco (5), Panama (2), Portugal (1), Senegal (1), Spaña (21), Tanzania (1), Emirato Uni Arabe (1) y Merca (3). E plataforma digital ta usa un algoritmo patenta pa asesora e calidad, e cantidad y relevancia di e comentarionan di usuari y opinion pa un periodo di 12 luna, y tambe e indice popular di e destinacion.
Follow NoticiaCla
