Cacho entrena na Aruba, ta haya arma uza pa asesinato na St Maarten

St. Peters - Un di e cachonan entrena na Aruba aña pasa pa detecta arma, a score e fin di siman aki na St Maarten. E cacho, un pastor belga, a logra localisa e arma scondi pa un criminal conoci pa polis. E ta sospechoso di e caso di asesinato di Lizcania Maduro. E homber mes, busca den e investigacion di asesinato di Lizcania Maduro, a wordo captura diasabra laat. E homber ta conoci pa polis como “Flamingo”. Segun informacion di polis den e area di St Peters, nan a tende tiro cai den Raspberry Road. Un residente a bisa cu tabatin un grupo di polis den e area cu a rondona e sospechoso.

ARMA PERDI

Ora cu e homber a mira polis e la cuminsa los tiro den nan direccion, pero ningun hende a resulta herida den e tiroteo. Den curso di e evento, polis a bisa cu e arma cu Flamingo a uza, pa tira polis cune, no por a wordo haya. Como tal a uza e cachonan specialisa, di cual uno tabata esun entrena na Aruba. Y den e caso aki, un di e cachonan aki a sa di localisa e arma aki.

CACHO ENTRENA

Esaki ta demostra un biaha mas e hecho cu Aruba mes por entrena cachonan specialisa pa varios tipo di disciplina. Tambe e ta demostra e cooperacion caribense, cu awor ta logrando su frutanan poco poco. Nota: E foto ta di e cacho despues cu e la localisa e arma, y a wordo recompensa cu su 'juguete'.