Tin 100 mil aangifte pa cobra 2.2 biyon florin na debe riba caya

ORANJESTAD - Manera e dignatario di finanzas Angel Bermudez a remarca na varios ocasion, tin algun aspecto cu mester tene na cuenta cun’e, por ehempel, relaciona cu e debe cu tin riba caya. Ta trata di e debe total di 2.2 biyon florin di cobransanan cu tin riba caya corespondiente na Departamento di Impuesto. Di otro banda tambe a actualisa e sistema di procesa ‘aangifte’ pues awendia tin aproximadamente un 100 mil ‘aangifte’ den cashi cu no a wordo procesa ainda. E mandatario diadomingo a bolbe mustra e importancia di e asunto aki di debe bieuw. 

DEBE MAS GRANDI

“Na e momento cu e sistema aki ta cla cu nos logra procesa tur ‘aangifte’ mi debe ta bira mas grandi, dus na luga di introduci cualkier impuesto nobo, mi ta prevalece pa cobra lo cual tin cu cobra pa baha e debe grandi aki cu ta birando dia pa dia mas bieu”, e mandatario a splica.Mes momento sinembargo e mandatario no ta reacciona riba e declaracion e.o. di oposicion di cu e debe biew por 'verjaar', esta cu no por cobra esaki mas despues di cierto aña. 

PRECUPACION DI GREMIONAN

Minister Bermudez ta consciente di e preocupacionnan di e diferente gremionan specialmente pa loke ta trata aumento y cobransa di impuesto, sin embargo e mandatario ta remarca cu henter e maneho aki ta un acto di balans. “Shonnan con cu bo haci’e; si bo implementa un impuesto nobo of bo cobra impuesto den un solo ‘shot’, e lo tin su efecto riba nos economia y probabilidad ta cu e lo por tranca nos economia tambe”, e dignatario a expresa.