Un di Aruba su miho locutornan Roberto Geerman a bay sosega

ORANJESTAD – Awe mainta Aruba a lanta cu e tristo noticia cu un di su locutornan mas grandi y icono Roberto A. Geerman (63) a bay sosega. Den fin di siman e la bira malo y a keda hospitalisa y awe mainta e noticia a drenta cu e la bay sosega den braza di señor. Durante su carera largo di radio, e la sa di crea un conocemento increibel di musica y informacion, cu hopi tabata yame e ‘libreria mobil’. Su conocemento riba tereno di musica, particularmente Carnaval y su historia tabata sinigual. Y porta mas conoci ainda pa su hazaña annual, e conteo di minuutnan di fin di aña a bira asina grandi cu varios radio tabata bay den cadena cu ne, pa nan tambe ‘forma parti’ di e momento aki. Hopi no por a pensa cu esaki lo tabata e ultimo conteo di fin di aña cu nan lo a tende na encargo di el gordo que produce. E la haya hopi apodo, El Gordo Que Produce, entre otro pa su maratonan carnavalezco, y e forma di impone su marca. “Mi nomber ta Roberto, y dibo?” tabata su forma di identifica su mes na radio. 

SALUD

Su salud semper a persiguie, y asina mes ora cu e la opera stoma, esakinan no a stop. Aña pasa na september tabatin momentonan di spanto ora cu diripiente noticia a cuminsa core cu Roberto a keda hospitalisa y tabata muriendo. Esaki a resulta notiica incorecto, pero si cu a hospitalize urgentemente. Dado momento el a bay te hasta pa Colombia pa su salud. E la recupera y a bolbe Aruba y a bolbe tuma rienda di su labornan, incluyendo su programa diario na Galactica FM y noticiero mainta trempan.

NOTICIACLA

Roberto tabata un fan #1 for di comienso di e lanzamento di Noticiacla ya casi 8 aña pasa. Tur mainta, den su noticiero, e tabata pasa por lo menos 3 pa 4 noticia di noticiacla, y tabata raporta cu placer, cu e la haye di nos. Nos tabatin contacto cune semanalmente. E tabata atento riba noticianan internacional, y tabata manda su app nan pa nos pa tene nos na altura ora cu tabata necesario. Si tabatin critica riba e portal di noticia, Roberto tabata un di e promenan pa defende noticiacla, pasobra e tabata kere den dje. “Mester tin mas hende di prensa skerpi, pero skerpi all the way” tabata su ultimo app cu e la manda nos siman pasa dialuna ainda, reaccionando riba un di nos comentarionan di notiicacla. Ruman, colega, bo lo haci falta. Hopi falta. Aruba ta perde un di su locutornan mas miho, y mas respeta. Cu Roberto sosega na PAZ.