Bermudez: Presupuesto 2015 no tin aumento di impuesto

ORANJESTAD - Presupuesto 2015 no tin ningun aumento di impuesto. Asina minister di finanzas Angel Bermudez ta declara den un comunicado emiti diadomingo. E mandatario ta informa cu recientemente e la ricibi e consehonan di Raad van Advies y desde siman pasa caba varios reunion a tuma luga cu demas Ministernan y nan ‘begrotingscoordinator’ pa asina repasa e parti cu ta toca na cada ministerio y asina nan por contesta e preguntanan y duna un splicacion debido respecto e maneho manera cu e la wordo inclui den e presupuesto .

AUMENTO DI BELASTING

Segun a splicacion di e mandatario pues, e situacion actual ‘no ta conta cu ningun aumento di belasting den e programa’. “Nos tin un maneho stipula y e maneho ey ta traduci den e asina yama ‘meerjarenplan’ cu a wordo entrega aña pasa riba recomendacion di e propio Cft”, asina Minister Bermudez a indica.

TRATA PRESUPUESTO

E mandatario a bisa cu si tur cos sigui cana conforme su planificacion e presupuesto lo por wordo trata prome cu final di maart na Staten. “Mi ta spera cu pa fin di e siman aki nos yega na un concepto total caminda cu nos lo purba di adapta mas tanto posibel y inclui e contestanan di e preguntanan di Raad van Advies pa despues nos manda e presupuesto pa parlamento.”