Encuesta: Vacuna ta evita hospitalisacion pero no ta garantia pa no haya Covid19

Encuesta: Vacuna ta evita hospitalisacion pero no ta garantia pa no haya Covid19

Posted on 01/13/2022 11:24 am AST | Updated on 01/13/2022 11:36 am AST

ORANJESTAD – E resultado di e ultimo encuesta di Noticiacla ta mustra entre otro cu e vacuna contra e virus Covid19 no ta un garantia pa bo no haya e virus pero mes momento ta mustra cu e ta evita hospitalisacion tambe. Algo cu hopi a bin ta bisa caba. Den e encuesta aki un total di 492 persona a participa di cual esaki tabata reparti casi 50-50 entre hende homber y hende muher. E meta di e encuesta aki tabata pa haya sa e comportacion di esnan cu a pasa den Covid, y of si nan a keda contagia y con a maneha esaki. 

E RESULTADO

E grupo mas grandi cu a participa na e encuesta, danki Dios no a keda contagia (ainda) cu e virus (63%), contra 37% cu si a keda contagia cu e virus Covid19. Interesante tabata e grupo cu si a keda contagia y cu tin cu tabata mas cu un biaha. Aki a resulta cu entre e grupo cu a keda contagia (37%), e grupo mas grandi (82%) a haya Covid19 pa di prome biaha, mientras cu 19% a haye mas cu un biaha. A enfoca si e personanan aki a haye mas cu un biaha, pero no specifico e cantidad di biaha, ya cu tin cu a haye mas cu dos biaha awor. Interesante tambe ta cu e grupo mas grandi cu a haya e virus Covid19 (62%), a indica cu nan no mester a bay den cuarentena, contra 38% cu si mester a bay den cuarentena. E pregunta tabata hopi specifico, puntrando si e persona mester a bay, y no si e la bay. Aki por tin diferencia di interpretacion di e pregunta tambe. Alavez no a specifica ki tempo a haya e contagio, y si e tempo ey, e reglanan tabata diferente cu awor.  

VACUNA

Entre esnan cu a participa na e pregunta aki, esta si nan a vacuna contra e virus, e grupo mas grandi (88%) a indica cu nan a vacuna. Entre esnan cu a bisa cu nan no a vacuna (12%), 40% a mustra cu nan no a vacuna, pasobra ‘nan no ta kere den vacuna’, mientras cu e siguiente grupo a usa e label ‘otro’ (37%). Tin un grupo tambe cu ta keda cu miedo pa efectonan di e vacuna, cu ta 19%. 

 

 

 

BOOSTER

Entre esnan cu a participa, e grupo cu a busca e booster caba, tabata un poco mas grandi (57%) cu e grupo cu no a busca un booster ainda (43%). E grupo cu no a haya e booster ainda, ta indica pasobra ‘nan no a bin na remarke ainda (44%) esta cu nan grupo di edad no a bin na turno ainda. Pero tin un grupo tambe cu a mustra claramente cu nan no kier e booster, y e grupo aki ta 19%. Y tin un grupo mas chikito, cu tin miedo di e efectonan (5%). 

 

CONTAGIA SIENDO CU TIN VACUNA

E seccion cu tambe a hala atencion ta e grupo di persona cu a keda contagia prome biaha y cu tabata vacuna of no. Entre e grupo cu a haya e virus prome biaha, 13% tabata vacuna caba, mientras cu 15% no tabata vacuna ainda. Pero ora cu a puntra esnan cu a haya mas di un contagio (pa di dos biaha), 7% a bisa cu nan tabata vacuna caba y toch a haya e virus atrobe, mientras cu 1% cu no tabata vacuna, tambe a haya e virus. Dus mas hende cu tabatin e vacuna, a haya e virus mas cu un biaha, contra esnan cu no tabata vacuna. 

HOSPITALISACION

 

Loke tambe e encuesta aki a mustra ta cu mientras cu bo a haya Covid19, sea prome biaha of di dos, y cu bo tabata vacuna, cu bo chens pa bay hospital ta minimo y cu e efectonan ta pone cu bo ta keda cas y por cura mas liher. Esnan cu a haye prome biaha pero y por a keda cas  tabata 24% mientras cu esnan cu mester a keda hospitalisa tabata 1%. Y pa esnan cu a haye di dos biaha, 4% a haye leve mientras cu nan por a keda cas, y ningun mester a keda hospitalisa. 

DISCLAIMER 

Noticiacla manera semper, no ta pretende cu su encuestanan ta representa henter e isla, ni cu tur hende tabatin acceso, mirando cu esaki tabata un encuesta electronico, pues cu no tur hende tin acceso na esaki.   Asina mes, e ta un indicacion interesante entre usuarionan di Noticiacla y ta genera material suficiente pa tene na consideracion.

  • Aruba a registra 411 caso nobo di Covid19, y 6 hende ta den ICU

    Aruba a registra 411 caso nobo di Covid19, y 6 hende ta den ICU

    ORANJESTAD - Segun resumen di awe 525 persona a recupera y un total di 411 caso nobo di COVID-19 a keda registra di cual 46 ta no-residente. E cifranan aki ta representa un 'Positivity rate' bou di nos residentenan di 58%. E cantidad di casonan activo di COVID-19 pa awe ta 2711 y cantidad di fayecidonan relaciona cu COVID-19 ta 184. Datos ta ilustra casonan nobo di COVID cu un averahe semanal di 562 caso pa dia y un averahe di 'positivity rate' semanal di 62% pa dia. 

  • Analysis: Pakico si, y pakico no…

    Analysis: Pakico si, y pakico no…

    Tur ora mi tin cu ‘hari’, pa no haci otro ora mi mira comentario of reaccion riba cierto noticianan cu wordo ubica en general, of mas specifico riba noticiacla.com. Mi ta compronde cu no tur ora bo ta di acuerdo cu e noticia, depende ki banda di e noticia bo ta para. 

  • Boostershots awo pa hobenan di 18 aña bay ariba

    Boostershots awo pa hobenan di 18 aña bay ariba

    ORANJESTAD - Entrante 14 di Januari 2022 DVG ta informa cu e edad pa ricibi e "boostershot" ta wordo reduci na 18 aña bay ariba. Bo ta bin na remarke si bo a ricibi bo di dos vacuna di Covid mas cu 3 luna pasa. Loke si ta pone cu bo no lo por bin na remarke na mes momento aki pa e “boostershot” ta si a test positivo menos cu 3luna pasa. Tur vacuna incluyendo "booster" por wordo busca na Centro Libertador Betico Croes na Santa Cruz. Orario di vacunacion ta di 8'or di mainta pa 3'or di atardi 'non-stop' di dialuna pa diabierna y por walk-in!

  • Aruba a registra 2 morto mas y 517 caso positivo di Covid19

    Aruba a registra 2 morto mas y 517 caso positivo di Covid19

    ORANJESTAD- 13 januari 2022. Segun resumen di awe 699 persona a recupera y un total di 517 caso nobo di COVID-19 a keda registra di cual 106 ta no-residente. E cifranan aki ta representa un 'Positivity rate' bou di nos residentenan di 62%. E cantidad di casonan activo di COVID-19 pa awe ta 2825 y cantidad di fayecidonan relaciona cu COVID-19 a aumenta na 184 forsa na famia di e fayecidonan. Datos ta ilustra casonan nobo di COVID cu un averahe semanal di 634 caso pa dia y un averahe di 'positivity rate' semanal di 63% pa dia. 

  • Director di hospital di Aruba tambe a test positivo pa Covid19

    Director di hospital di Aruba tambe a test positivo pa Covid19

    ORANJESTAD – Director di Horacio Oduber Hospital, sr Jacco Vroegop, mescos cu hopi na hospital, no a scapa di e efectonan di e pandemia di Covid19 y a test positivo awe pa e virus. E kehonan ta minimal, y e director lo trata esaki tambe conforme e protocol necesario. Manera ta conoci, e director no ta vacuna, cu ta un decision personal, pa cual e la informa cu e ta tuma tur responsabilidad p'e. 

  • Aruba a registra 575 caso positivo di Covid19 awe. Casonan ta bahando

    Aruba a registra 575 caso positivo di Covid19 awe. Casonan ta bahando

    ORANJESTAD - Segun resumen di awe 909 persona a recupera y un total di 575 caso nobo di COVID-19 a keda registra di cual 62 ta no-residente. E cifranan aki ta representa un 'Positivity rate' bou di nos residentenan di 61%. E cantidad di casonan activo di COVID-19 pa awe ta 3008 y cantidad di fayecidonan relaciona cu COVID-19 ta 182. Datos ta ilustra casonan nobo di COVID cu un averahe semanal di 709 caso pa dia y un averahe di 'positivity rate' semanal di 63% pa dia. 

  • Powered by SETAR