Tin 18 miyon florin presupuesta pa paga mitar di e recorte di 12,6% den aña 2022

ORANJESTAD - Tin 18 miyon florin presupuesta pa paga mitar di e recorte di 12,6% den aña 2022. Pero tur cos ta depende kico Hulanda dicidi den e proximo reunion di RMR. Asina minister di finanza Xiomara Maduro a bisa e siman aki. E suma aki ta refleha den un subida di gasto di 8 miyon na Gasto di Personal y un subida di 10 miyon na gasto di Subsidio. 

CONDICION 

Manera ta conoci, e recorte di 12,6% ta un condicion pa haya sosten di likidez di Hulanda, pesey pa por paga e mitar di e recorte di 12,6%, Gobierno a manda pidi Conseho di Minister di Reino pa por haci e gasto extra aki den Presupuesto 2022. Aruba ainda no a haya un contesta. CAFT den su conseho na Gobierno riba Presupuesto 2022, a pidi pa kita e suma presupuesta pa paga e 50% di e recorte, pero Gobierno a reacciona bisando cu ta warda e decision di Conseho di Minister di Reino y lo haci cambio si ta necesario.