E motibo real pakico Southwest a scohe Aruba atrobe como destinacion

ORANJESTAD – Un biaha mas e aerolinea Southwest a scohe Aruba pa crea su ‘historia’ den aviacion comercial. Cu un ceremonia yena di discurso y blas y bolo e fin di siman aki, Southwest y Aruba a celebra otro buelo internacional for di Merca. E biaha aki a scohe Houston su aeropuerto Hobby pa bula pa Aruba. E motibo mes pakico a scohe Aruba atrobe sinembargo, no a wordo duna publicamente. Esey no ta kita afo cu e tabata un momento di hubilo. Mientras cu e motibonan duna publicamente ta hopi, e realidad ta cu ta un motibo principal tin, y posiblemente e unico pa esaki: E hecho cu Aruba ta ofrece e servicio di ‘US Pre Clearance y Customs”. E specialista pa e aerolinea, Dan Landson, a confirma esaki na NoticiaCla.com diasabra.

DESTINACION ARUBA

Yen di blas a dorna e porta di salida di aeropuerto diasabra, pa ricibi e extra buelo internacional di Southwest. E prome despues di apenas 8 luna cu e prome internacional a tuma lugar caba cu e mesun aerolinea. Solamente e ciudad di origen tabata diferente. E destinacion ‘final’ tabata mescos. Aruba. Y e tabata motibo suficiente pa celebracion grandi pa tanto Aruba como Southwest, un aerolinea un tempo considera chikito cu apenas 3 avion na 1971, y cu a crece te na 700 avion y mas di 45.000 trahado.

MOTIBO PA SCOHE ARUBA

A scohe Aruba pues pa e servicio menciona. Esey no ta haci nos isla unico, ya cu tin mas isla cu tin e servicio aki. Bahamas y Bermuda. Bahamas ta mucho lew, y Bermuda no ta den Caribe. Y otro islanan den Caribe no ta ofrece esaki ainda. Y Landson tabata hopi cla den esaki. Berdad cu durante e ceremonia, nan a papia cu tin 3 motibo cu hende ta prefera Southwest. E hecho cu no ta cobra pa extra maleta, cambio di pasashi, y e servicio simplemente ta fabuloso abordo. Cu esaki kier men, free Wi-Fi, pelicula ilimita pa 8 dollar solamente y mas.

Un punto cu por a pone Aruba riba Bahamas, porta ta e demanda pa Aruba for di Houston, segun Landson, cu ta mas grandi. Pues ta keda solamente Aruba. Pa un buelo internacional por drenta Merca directo, mester di e servicio di US Pre Clearance. Y Aruba pues, pa awor, tin e servicio aki ‘practicamente su so’. E ta demonstra mes momento cu e ta un logro grandi, cu hopi biaha nos no ta para keto na dje. Un logro cu Aruba tin asina hopi beneficio di dje, cu e mes kier tuma responsabilidad pe.

LOGRO MAS PA ARUBA

Esey no ta kita afo cu ta momento pa gloria. Un otro buelo pa Aruba cu ta pone cu mas turista por disfruta di nos isla su hospitalidad. Y for di e palabranan di Landson, no ta descarta cu aki 8 luna por tin mas informacion positivo for di Southwest pa Aruba.