- Segun Hulanda, Aruba y Corsou mes ta dificulta reapertura di frontera Venezolano
- Aruba a registra 411 caso nobo di Covid19, y 6 hende ta den ICU
- Rijna: No obstante cifra record di Covid19 na Bonaire, no mester Toque de Queda
- Oduber: Ta desmenti cu no ta paga ambtenaarnan no vacuna contra Covid19 si nan bay den cuarenta
- Minister di Australia a revoca visa di tenista number uno di mundo
Merca a pone Corsou bek riba lista di riesgo halto pa biahe tambe
WASHINGTON – Mescos cu a sosode un siman prome cu Aruba, Merca a cambia su conseho di biahe pa Corsou y pone e isla riba e isla ruman riba e lista di riesgo mas halto posibel, esta e lista cora. Cu esaki e ta desconseha Mericanonan pa biaha pa Corsou te proximo aviso. Tur Mericano of ciudadano Mericano cu bolbe Merca di Corsou, mester presenta un PCR test negativo un dia prome cu nan biaha, y ora cu nan yega Merca, dentro di 3 pa 5 dia tuma un antigene test tambe. Pa esnan cu dentro di 90 dia a recupera di e virus, no tin cu haci esaki. Y biaheronan cu no ta vacuna completamente, mester bay 5 dia den cuarentena. Na Aruba for di siman pasa caba e regla aki a keda stipula, cu a causa problema serio pa e sector turistico.
Corsou a kibra record surpasando 10 mil caso activo di Covid19
WILLEMSTAD – Corsou diahuebs anochi a kibra record di casonan activo di Covid19, surpasando 10 mil caso. Tabata anochi laat cu e informacion a drenta di e cifranan di dia unda cu Corsou a registra no menos cu 10.801 caso activo, y pa e dia ey, atrobe riba 1000 caso, specificamente 1065 caso. Ademas e cantidad di casonan hospitalisa tambe a aumenta te na 40 di cual 15 ta den ICU. Y pa loke ta e casonan di morto, esaki ya lo a surpasa 200, mirando cu ayera tabatin mortonan pero cu ainda no a keda registra. Oficialmente e cifra ta na 199, pero esaki lo cambia awe diabierna mas sigur.
Casonan di COVID-19 cu casi 10 mil a sali for di control na Corsou
WILLEMSTAD.- Na Corsou tin casi 10 mil hende activo contagia cu Covid19 desde diaranson. E casonan activo a yega 9979 diaranson, cu 2 morto mas y 1107 caso activo nobo riba un solo dia. Tabata dos dia pasa cu a yega 9 mil, y den dos dia esaki a bira casi 10 mil. E cantidad di morto tambe ta aumentando diariamente y awor ta casi na 200 morto (199). Hospital tin 31 persona cu Covid19 di cual 11 ta den cuido intensivo. Aya e grupo di recuperacion ta menos pa dia compara cu Aruba. Awe gobierno lo tin otro conferencia di prensa riba e tema aki, y lo presenta posibel medida y aclariacion riba cierto actividadnan cu lo por a conduci na mas contagio.
Hospital di Corsou ta stop tur tratamento electivo debi na scarsedad di personal
WILLEMSTAD – Entrante awe dialuna, hospital di Corsou, Curacao Medical Center (CMC) ta stop tur servicio electivo. Esaki debi na scarsedad di personal. Debi na e contagio masivo di Covid19, tin por lo menos 130 personal na cas contagia, mientras cu tin 50 den cuarentena. Total tin 1231 persona trahando full time na e hospital. Esey ta nifica pues cu mester haci escogencia. Loke si ta sigui, ta operacionan agudo y esencial. Tur otro tratamento of operacion, ta para por lo pronto.
Corsou ta pone Toque de Queda mas tempran atrobe y habri scol un siman mas laat!
WILLEMSTAD – Debi na e aumento drastico di contagio di Covid19, Corsou a cambia su orario di Toque de Queda pa 10’or di anochi entrante 7 di januari 2022. Hunto cu esey, a anuncia cu scolnan lo habri dia 17 di januari 2022 envez di 10 di januari. Tur medida anuncia lo ta valido pa 10 dia. Ademas no ta permiti actividad Deportivo den grupo, y ta cancela tur permit pa eventonan. Esaki prome minister di Corsou Gilmar Pisas a anuncia diahuebs mainta durante un conferencia di prensa. Te cu ayera, nan tin 5722 caso activo, y a registra 1056 caso positivo riba diaranson. Nan tin 31 persona den hospital di cual 8 tabata den cuido intensivo.
Martina: Hospital na Corsou a yega su limite di capacidad debi na Covid19
WILLEMSTAD – Te cu awe mainta tabatin 22 pashent hospitalisa pa Covid19 na Corsou den Curaçao Medical Center (CMC). Di esey tin 8 den ICU. Cu esaki hospital a yega su plafond di capacidad. Un ola nobo di contagio no ta manehabel pa e hospital. Asina e director general Gilbert Martina a bisa na e radio di Corsou Z86 na e moderador Orlando Cuales.
Na Corsou tambe fila tabata largo pa test pa Covid19 dialuna
WILLEMSTAD – No ta na Aruba so tabatin fila largo di auto dialuna pa test pa Covid19. Pais bisiña Corsou tambe a raporta fila largo pa esaki. Eynan e cantidad di casonan ta mucho mas hopi cu Aruba, casi doble (e casonan activo total tabata 4249 ayera), y ta premira cu esaki lo sigui aumenta. Dialuna tabatiin 411 caso pa di dos dia consecutivo, cu ta menos si cu e dianan anterior. Segun potret di e portal Extra, filanan tabata largo pa bay e post di GGD na Mundo Nobo. Corsou ta papia di cifranan alarmante.
Follow NoticiaCla
