Hospitalisacion pa Covid19 ta aumentando lihe e siman aki

ORANJESTAD – E cantidad di pashent interna pa Covid19 ta aumentando. Den apenas un dia, e cantidad a subi di 17 pashent hospitalisa, pa 31 cu ta un aumento di 14 pashent den un solo dia. Mientras cu nan ta menos serio cu tempo di e olanan anterior, noticiacla a compronde cu e hospitalisacion ta keda un peso si pa e personal di hospital. Manera cu Crisis Team a bisa siman pasa, tabata spera un aumento di hospitalisacion e siman aki y esey ta sosodiendo tambe. 

CIFRANAN

Diadomingo 9 di januari tabatin 17 persona hospitalisa (4 den ICU y 13 regular), y ya pa dialuna 10 di januari, siman a habri cu 14 pashent mas, di cual 5 tabata den ICU y 26 riba piso regular cu ta inclui un pashent tambe cu ta riba piso cu ta recuperando di Covid.