Video di homber pidiendo su pareha matrimonio na Aruba ta bay viral

ORANJESTAD – Usando e beach di Aruba como su plataforma final, un homber hoben mericano a propone matrimonio na su pareha. Riba dje, nada nobo y tampoco noticioso. Pero e forma cu e la hacie, y e atencion cu e video aki a haya, a hacie un caso peculiar y noticioso a la vez. E homber a documenta su intencion pa un aña largo riba video y publica esaki despues. E video a core rond mundo y duna Aruba e cobertura necesario, por nada.

E STORIA

Den e storia, e homber, -identifica como Dean Smith -, ta mande un video riba su cumpleaño, un feliz cumpleaño. Loke cu pareha di Dean no sa ta cu Dean lo propone na su pareha , -identifica como Jennifer-, tur dia, pa un aña largo y a filma tur e dianan y pone hunto. Na tur forma, e ta puntra Jennifer pa medio di un cartolina cu un texto di ‘bo kier casa cumi’ etc. E ta envolvi henter su famia y famia di su pareha, te cu nan ta yega Aruba.

PIDI MAN

Dado momento, na final di e video, Dean ta puntra Jennifer riba su cumpleaños (di Jennifer) pa wak patras. (Jennifer ta sinta riba un stul riba e beach dilanti Playa Linda Hotel na Palm Beach), y e ta mira su guy Dean bisti na bachi. Nan ta para hunto y dilanti tur hende riba e beach na Aruba, Dean ta bay riba rudia y pidi Jennifer pa casa cune. Y ta mas cu claro cu Jennifer ta acepta.

VIDEO

E acto aki a wordo publica riba un website di San Francisco den e estado di California. E video mes di algo mas di 15 minuut, ta riba youtube y a wordo mira casi 3 miyon biaha caba. Sigur un propaganda unico pa Aruba, y cu a duna miyones di hende e inspiracion con pa pidi nan pareha matrimonio, y posiblemente pa haci esaki na Aruba.

ATA

Den combersacion cu hefenan di Aruba Tourism Authority, a compronde cu nan ta bay haci algo pa e personanan aki, aunke no kier a bisa kico exactamente. "Nos ta bay haci algo. Nos ta na altura di e caso bunita aki" CEO di ATA, Ronella Tjin-Asjoe a confirma na NoticiaCla.com.