Tanto yiu di prome minister Wever y yiu di politico Williams ta den libertad atrobe

ORANJESTAD – Tanto yiu di prome minister Wever Croes, esta Kevin W como yiu di e politico Michaeal Williams esta Chris W a keda den libertad diasabra atardi. “E motibo ta cu ta cla cu scucha nan y no ta necesario pa nan keda mas largo den detencion”. Asina vocero di ministerio Publico Ann Angela a bisa noticiacla diasabra. “Nan ta sigui como sospechoso y unavez e investigacion ta full cla, fiscal lo tuma un decision final” Angela a finalisa bisando. 

E CASO

Manera ta conoci ayera tardi  e detencion di yiu di prome minister Wever, esta Kevin W. como yiu di e politico Micheal Williams, Chris W. a keda prolonga diabierna atardi despues cu ambos a entrega nan mes algun ora prome pa interogacion. Ambos den curso di dia a presenta na warda di polis unda cu ambos a keda interoga y despues a dicidi pa prolonga e detencion di ambos cu 2 dia. Esey kier men cu nan ta keda deteni pa 2 dia, pendiente e siguiente pasonan. Esey sinembargo no ta un garantia cu nan lo keda deteni pa tur dos dia, sino te ora cu huez comisario dicidi otro. 

E DETENCION 

Manera cu e portal aki a raporta caba, e detencionan ta den cuadro di un problema cu a surgi na November ultimo unda e dos personanan aki lo a topa otro y un que otro a tuma lugar resultado den bringamento y destruccion na un restaurant local na Aruba unda cu un chef di e restaurant a keda herida na su braza. Denuncianan a wordo haci e tempo ey y algun persona a keda deteni, entre nan ruman di Chris W, esta Nigel W. y despues laga bek den libertad.