Dashi special pa participa na “Caribbean Jamboree”

ORANJESTAD /WILLEMSTAD - Recientemente a entrega e dashi di contingente na e scoutnan y lidernan cu lo participa na e di 15 “Caribbean Jamboree” (Caribjam 2014) cu ta tuma luga e aña aki na Corsou. E ceremonia a tuma luga riba Linear Park y a conta cu un grupo grandi di miembronan di e movecion scout di nos isla. “Caribjam” ta un campamento di scouting, den cual paisnan di region Caribense ta participa activamente. E contigente di Aruba lo consisti di no menos cu 87 persona. Durante e Caribjam 2014 e scoutnan lo intercambia cu nan rumannan scout di otro paisnan. Lo tin diferente actividadnan na diferente luganan di Corsou. Riba di 25 di Juli e participantenan lo duna presentacionnan cultural. E dia ey, publico por bishita e campamento. E contingente di Scouting Aruba ta prepara pa representa Aruba dignamente. Entre e delegacion di Aruba lo tin lidernan scout hunto cu miembronan di e organisacion di Aruba, cu sin duda a hinca un presentacion sin igual, pa pas den e programa cu e organisacion di Corsou tin cla pa tur e paisnan Caribense cu ta participa e aña aki na e evento. E movecion scout ta existi desde aña 1907 ora cu Lord Baden Powell a cuminsa cune 106 aña pasa y cu lo keda existi pa semper pasobra “Once a Scout, Always a Scout”. A funda Scouting Aruba dia 23 di April 2000 despues cu 4 organisacion scout a uni y forma un solo organisacion. Scouting Aruba a logra afilia na Interamerican Scout Organisacion (ISO) cu ta miembro tambe di World Scout Organization esta WOSM.