Mientras cu ICU ‘ainda’ ta manehable, 10% di personal HOH mes ta malo na cas

ORANJESTAD – Aworaki tin mas di 100 trahado di hospital na cas, contagia cu Covid19. Asina fuentenan den hospital Horacio Oduber ta informa e portal aki. Esaki ta 10% di e totalidad pues por compronde cu hospital por ta ‘safe’ ainda pa cu e maneho di ICU, pero tur otro caminda esaki ta pisando basta. Manera ta conoci, Crisis Team ta usando Hospital como midi pa dicidi si ta aumenta medida of no. Y mientras cu ICU ta manehable, of ‘bashi’, esaki ta motibo pa ‘trankilidad’. E realidad sinembargo por ta otro.

CAPACIDAD DI ICU

Te cu ayera, tabatin 21 persona hospitalisa pa Covid19, di cual 3 tabata den ICU. Actualmente hospital tin 12 cama di ICU, completo cu personal. Mester conta cu pa cada cama tin por lo menos 3 persona full time. Di e 12 camanan, tin 6 ocupa actualmente, di cual 4 ta cu pashent di Covid (ayera tabata 3). Unabez cu tin 10 cama ocupa, esaki ta momento pa HOH bati alarma y/of ta schaal af, cu ta nifica cu ta limita servicio na pashentnan, cu por nifica cu no ta haci nada cu no tin di haber cu Covid19. Tur esaki pa evita cu HOH ta haya su mes den un situacion di Code Preto, esta cu tin cu brutalmente bisa, ‘tin cu dicidi ken ta yuda pa e por keda bibo y ken no’. Esey ta nifica aworaki cu si e situacion keda asina, falta 4 cama mas pa yena, pa hospital bati alarma. Y mirando con liher cos ta bayendo, no ta descarta cu den cuestion di algun dia, prome cu nos yega asina. 

SHARLINE KOOLMANTabata diaranson cu e miembro di Crisis Team Sharline Koolman Wever a mustra cu lo dura por lo menos un siman prome cu nos yega e peak, esta e punto maximo di contagio, prome cu esaki cuminsa baha. Mes momento e la bisa cu ta premira cu no ta cuestion si hospital lo yena, sino ki dia. A premira cu dentro di algun dia por mira aumento di hospitalisacion.