Sindicatonan lo tuma accion legal y laboral si gobierno tuma paso contra nan

ORANJESTAD - Si Gobierno opta pa retene atrobe un parti di e salario di e trahador cu lo ta trahando 12.6% menos, esaki lo forma un sancion desproporcional, inaceptabel y inhusto. Forsosamente e sindicatonan lo mester bai tuma accionan legal y/o laboral den tal caso. Asina e 5 sindicatonan cu ta representa trahadonanpublico a contesta e carta di ayera di prome minister Evelyn Wever, diahuebs atardi. Nan ta reacciona riba e ponencia cu gobierno a ‘menasa’ di tuma paso si e miembronan di sindicato dicidi di traha 2 dia menos pa luna entrante otro luna. Esey tabata nan punto como medida contra e hecho cu ainda gobierno no kier kita e recorte salarial di 12.6%. Den un carta un dia anterior, e sindicatonan a informa gobierno di nan intencion pues, di no traha 2 dia pa luna entrante otro luna (februari). Gobierno mesora a responde bisando cu nan no por tuma cierto decisionan asina unilateral, y cu e lo tin consecuencia pa e trahadonan. 

UNILATERAL

E sindicatonan ta atende cu gobierno riba e ponencia di gobierno cu sindicatonan kier ‘unilateralmente’ dicidi pa no traha 2 dia pa luna entrante oro luna. “Pa remarca awor cu no por reduci oranan unilatermente, ta remarcabel tambe cu desde inicio (1 di mei 2020) Gobierno si a haya ta bon pa unilateralmente reduci e salario di e trahadornan. Den esaki mester tin tambe igualdad den trato” e sindicato ta bisa den nan carta.  Ademas, e sindicatonan menciona ta di opinion cu un compensacion justo pa e reduccion di e salario (incluyendo beneficionan) di 12.6% mester ta un reduccion den e orarionan di trabou pa un igual percentage. Segun e sindicatonan, den e caso aki Gobierno no por exigi cu e trahador ta traha e mesun cantidad di ora pero ta ricibi menos pago pa esaki. “Ta remarcabel cu Gobierno a permiti y te asta impone esaki den sector priva caminda cu e reduccion den salario a bai man den man cu un reduccion den oranan di trabou. Lo ta inconsistente y un abuso di poder si Gobierno ta impone esaki na otronan y no na su mes”.

GOBIERNO NO A CUMPLI

Loke tambe e sindicatonan ta mustra gobierno ta riba articulo 8 di e Landsverordening tijdelijke versobering bezoldigingen en voorzieningen overheid, cu ta ensera un obligacion di Gobierno pa entrega un relato por escrito di e efectividad di e reduccion temporal di salario, pa asina tambe e trahador cu a entrega (forsosamente) parti di su salario, por mira e efectividad di esaki. “ For di esaki tambe lo por deduci si y pa cuanto tempo mas y den ki grado lo mester continua cu e reduccion (of no). Gobierno no a cumpli cu e obligacion legal aki, cual sindicatonan ta bolbe exigi pa cumpli cu esaki” e sindicatonan ta finalisa bisando. Por lesa e carta completo AKI.