Minister Oduber: Ta e director di HOH mester clarifica su declaracion riba vacuna contra Covid19

ORANJESTAD – Ta keda na e director di hospital Jacco Vroegop pa splica kico exactamente e tabata kier men cu su declaracion reciente den e vespertino Amigoe. Asina minister di Salud Dangui Oduber a bisa noticiacla diaranson den un conferencia di prensa riba Covid19. Manera ta conoci, e declaracion di e director riba e situacion di vacuna, no a cay den bon tera cerca e mandatario, cu mesora a reclama publicamente riba esaki. E siman aki a bira conoci cu e Management Outbreak Team di Hospital (OMT) tambe a distancia su mes di e declaracion aki. Mes momento e mandatario a splica cu e declaracion haci, tabata a titulo personal y no necesariamente como director di e hospital. E mandatario ta haya cu e director mester a tuma contacto cu e OMT prome, mirando cu e ta forma parti di e ekipo aki. Y cu su declaracion, esaki a crea un situacion no corecto. “Nos tin cu mira e siguiente dianan con nos ta bay atende cu e caso aki” e mandatario a bisa. E la confirma cu e la sinta cu e director caba. Tambe e mandatario a aclaria tambe cu no ta pasobra e director a expresa su mes, automaticamente lo tin consecuencia pe. “Nos ta biba den un pais liber. Tur hende tin derecho di expresa nan opinion pero bo mester expresa bo opinion cu e facts nan si” e mandatario a sigui bisa. No ta corecto pa mal informa y crea sensacion incorecto y creando e impression como si fuera e vacuna no lo a duna e resultado.