Sindicatonan y gobierno a habri aña cu impasse: Traha menos ora tin consecuencia!

ORANJESTAD – Sindicatonan cu ta protestando recorte salarial di 12.6% a informa gobierno di Aruba (lesa: prome minister Evelyn Wever) diaranson anochi cu como forma di protesta, nan lo cuminsa traha 2 dia menos pa luna entrante 1 di februari proximo. Esaki ta te ora cu haya un reaccion positivo riba e asunto di recorte. Gobierno mesora (lesa: Prome minister Evelyn Wever Croes) a responde y a informa nan cu si esaki sosode, lo considera esaki ‘plichtsverzuim’ y tin su consecuencianan. 

CARTA DI SINDICATONAN

E sindicatonan a mustra den nan carta cu aña a habri sin cu nan a haya un contesta y of solucion riba e asunto di recorte salarial. Ta trata di e sindicatonan SIMAR, SADA, SEPPA SPA y FTA. Nan ta lamenta e posicion di gobierno den e caso aki. “E proposicion di banda di gobierno te cu dia di awe no a yega cerca e sindicatonan pa discussion cual ta stroba partidonan tambe pa yega na un solucion” e carta ta sigui bisa. Tambe e sidicatonan ta mustra cu ‘ta sorprendente e ‘supuesto’ yamada na sindicatonan pa discuti na mesa pero no ta menciona ni dia ni ora. 

GOBIERNO A REACCIONA

Gobierno den un reaccion liher, a mustra cu nan (e sindicatonan) posicion unilateral no ta corecto y no ta posibel sin consecuencia. A mustra cu un empleado publico of ‘gelijkgestelde’ no por dicidi riba sum es cu e ta bay traha menos ora of dia. “Si esaki sosode toch, esaki ta plichtsverzuim y tin su consecuencianan. 

HULANDAA recorda e sindicatonan cu ainda Hulanda no a trata e peticion di gobierno di Aruba pa stop e recorte. Pues no ta asina cu no kier stop e recorte, sino cu gobierno no por sin pone na riesgo e sosten di likides necesario den 2022.  

INVITACION

A ripiti e invitacion na e sindicatonan pa dialogo y ta spera cu nan lo reconsidera e posicion di no sinta na mesa si no tin recorte prome. Lesa e carta di sindicatonan AKI, y di gobierno AKI