Huez ta bati riba dede di ex minister den asunto di tereno den sentencia

ORANJESTAD – E caso ta uno cu a tuma lugar mitar di aña pasa, pero ta awor a bin na luz di dia di puro coincidencia. Un periodista na Corsou a dal riba e veredicto aki, y a trece den publicidad. Ta trata di un otro caso cu ta trata ex minister Benny Sevinger, awe sospechoso principal den un caso penal di tereno. Actualmente e ta parlamentario pa partido AVP. Mientras cu e sentencia den e caso aki tabata casi final di aña pasa, e hecho cu e persona actualmente ta un sospechoso den un caso penal pa actonan similar, ta dune relevancia pa trece dilanti awor. 

PUBLICIDAD 

Lo interesante ta cu ora cu e caso a bin dilanti, e no a haya publicidad, cu ta algo cu abogadonan envolvi den e caso a confirma e siman aki pa e portal aki. E caso mes pues, a tuma lugar mitar di aña y ta casi final di aña 2021, den e sentencia, un huez a hala atencion di ex minister y actual parlamentario Benny Sevinger durante e caso civil. E caso a haya atencion diripiente e siman aki, ora cu publicacionan di e veredicto a keda publica. Tabata te fin di November cu e caso a keda publica. Ta trata di otorgamento di un tereno pa un compania, door di e ex mandatario net prome cu e baha como minister na 2017.

E CASO

E compania Ocean Eco Cleaning and Supplies VBA aña pasa a hiba gobierno di Aruba corte pa logra pa gobierno cumpli cu e promesa cu e ex mandatario en cuestion a haci cu otorgamento di tereno na San Nicolas. E otorgamento di terenonan a haya aprobacion inicial di e ex mandatario dia 22 di September 2017, mientras cu e mandatario tabata demisionario. Ora cu gobierno nobo a sinta, nan a cancela e deal aki. Como tal e compania menciona a dicidi di bringa esaki, pero a tuma un tempo pa haci esaki. 

PETICION

E compania tabata kier pa huez ordena gobierno pa otorga e terenonan manera cu a priminti, sino mester a paga multanan cuantioso. Huez a mustra cu ta trata di un decision dudoso y incomprendibel di un minister demisionario, net prome cu cambio di gobierno. Segun e huez, e accion di e ex minister, ta crea un violacon di principio fundamental principios fundamentales di ordenamiento huridico di Aruba y como tal ta cancela e acto aki basa riba articulo 3.40BW. E huez no tabatin bon palabra pa e ex mandatario, y ta mustra cu sin e sancion contra e minister, e gabinete ‘nobo’ lo a wordo stroba den ehecuta su tarea publico pa cu e percelanan en cuestion. “E actuacion di e minister demisionario ta mas cu dudoso y incomprendibel”. E huez ta mustra aki riba e rapidez sin precendente cu e minister a tuma e decision di otorga e terenonan aki, mientras cu otronan tin cu warda lunanan of añanan pa un decision. Tambe ta mustra cu e ex minister no a haci ningun investigacion y no a haya ningun tipo di conseho prome cu e a actua. “Awor cu e actuacion di e minister demisionario ta contra orden publico y como tal nulo, ta haci cu e acuerdo entre e partidonan tambe ta nulo”. Basa riba esey, huez a dicta fayo den e caso y no a otorga e peticion na e compania en cuestion. E sentencia por wordo lesa AKI.