Koolman(Crisis Team): Por dura un siman mas prome cu yega peak di ola # 5

ORANJESTAD – Lo dura por lo menos un siman mas prome cu nos yega e peak di e ola # 5 di Covid19. Asina e miembro di Crisis Team, hefe di e departamento di malesa contagioso di DVG, Sharlene Koolman Wever a bisa diaranson mainta durante un conferencia di prensa. Segun Koolman, nos no a mira e peor ainda y como tal, e cifranan lo por sigui subi por lo menos un siman mas prome cu nos cuminsa wak un bahada. For di fin di December 2021 Aruba a cuminsa sinti e efecto di e di 5 ola di e pandemia actual Covid19. Y rapidamente cifranan a cuminsa aumenta te cu nos a yega casi 6 dia cu e cifranan diario no tabata baha bou di 400. Awor nos tin dos dia cu e cifra ta pasa e cantidad record di 1000 pa dia. Y mirando e filanan awe atrobe, no ta descarta cu e cifranan lo keda hopi halto pa e proximo dianan, mas tarda un siman. Unabez cu e punto mas halto yega, lo cuminsa mira un ‘normalisacion’ atrobe.