OMT di hospital ta distancia di comentario di director riba vacunacion contra Covid19

ORANJESTAD – Un grupo di por lo menos 11 profesional medico di hospital Horacio Oduber cu ta forma parti di e Outbreak Management Team (OMT) di hospital, pa medio di un carta dirigi na gobierno di Aruba y Crisis Team, ta distancia nan mes di e comentario di nan director di hospital Jacco Vroegop haci den un articulo recien den e vespertino Amigoe riba vacunacion. 

E ARTICULO

Den e carta dirigi specficamente na minister di salud Dangui Oduber, nan ta bisa cu nan ta distancia nan mes di e contenido di e articulo y ta lamenta e consecuencia negativo cu e noticia aki por tin riba e disponibilidad di comunidad pa cu e proceso di vacunacion. “Nos kier enfatisa cu e meta primordial di e vacuna ta pa evita malesa serio y fayecimento. E efecto aki ta keda vigente, tambe cu e variante Omicron, aunke den forma menos”. 

Tambe e miembronan di e OMT ta mustra riba e forma di biba saludabel manera ta wordo sugeri den e articulo di vespertino como un miho forma pa combati e virus aki. Nan ta sostene biba saludable, pero den e caso aki ta evitente cu na Aruba mester vacuna pa proteha contra e consecuencia mortal di e virus aki. Ta haci referencia na otro paisnan cu tambe a usa e forma di ‘biba saludabel riba e vacuna’ pero cu a lamentablemente costa hopi bida. “Como tal nos ta haci un yamada na comunidad pa duna oido na e vacuna y pa tuma e booster shot tambe”, e carta ta sigui bisa. E carta ta duna impression cu e OMT ta laga e director di hospital cay, pa loke ta su declaracionan haci den e articulo refutando e contenido.  

CONSECUENCIA

No ta conoci ki consecuencia e carta aki lo tin pa e director y su futuro na Aruba. Ta conoci cu e minister responsabel pa salud, Dangui Oduber a condena e declaracion di e director y a pidi’e pa e aclaria y resisti di e declaracion aki y trece clarificacion. E portal aki a compronde cu tras di cortina, tin combersacionan andando y tin cu warda wak kico lo sosode den e proximo dianan riba e tema aki. Pa lesa e carta completo, click AKI.