Aruba a kibra record cu 1028 caso positivo awe di Covid19!

ORANJESTAD – Manera a anticipa, Aruba a kibra otro record diamars pa e cantidad di caso positivo pa dia di Covid19. E portal aki a compronde cu dialuna un total di 2200 persona a test, e total cu a sali positivo, tabata 1028. Tabata diabierna ultimo cu Aruba a conoce su ultimo record nobo cu tabata 742 caso positivo nobo. 

Segun resumen di awe  692 persona a recupera y un total di 1028 caso nobo di COVID-19 a keda registra di cual 99 ta no-residente. E cifranan aki ta representa un 'Positivity rate' bou di nos residentenan di 66%. E cantidad di casonan activo di COVID-19 pa awe ta 3327 y cantidad di fayecidonan relaciona cu COVID-19 ta 181. Datos ta ilustra casonan nobo di COVID cu un averahe semanal di 670 caso pa dia y un averahe di 'positivity rate' semanal di 61% pa dia. 

Actualmente na Aruba tin 21 persona interna debi na COVID di cual den ICU tin 2 persona y riba piso general tin 19. Na Colombia tin actualmente 3 persona den ICU y ninguno (0) riba piso general.