Situacion laboral na Aruba ta delicado debi na contagio halto di Covid19

ORANJESTAD – Aruba no mester di un lockdown manera cu nos a conoci na inicio di 2020 pa e pandemia. Segun director di Medwork Ru Croes, comercio ta practicamente den un lockdown caba. “E situacion ta masha delicado mes” sr Croes ta bisa. E ta mustra cu desde 23 december aña pasa, tin un averahe di 300 persona pa dia ta ‘meld ziek’, osea AO. “Ayera 437 den 4 ora” sr Croes a sigui bisa noticiacla. E ta mustra cu esey ta pone cu e situacion ta bira dificil pa un compania sigui opera. “Compania-cliente no tin hende pa traha. No mester di un lock down, e cantidad di compania ya ta den un lock down pa motibo di escasedad di hende pa traha” Croes a sigui bisa. 

SITUACION LABORAL

Manera cu noticiacla mes a raporta dialuna, for di dia 23 di December e situacion di contagio a bira dje alarmante cu e cifra di contagio no ta baha bou di 400 y ta mustra cu esaki lo sigui sigur pa algun dia of siman mas. Y cada persona cu ta contagia of ta den un cuarantena, ta nifica cu e no por ta na trabou, cu consecuencia cu e compania ta ‘short’ di hende. Tin varios compania cu mester a cera nan porta completo, pasobra algun trahado a contagia y mester a manda e resto cas pa proteccion. Mirando e cifra di contagio riba 2000 aworaki, por facilmente saca conclusion cuanto hende ta na cas, fuera di esnan cu ta contagia, cu ta stroba e operacion comercial di funciona manera cu mester.