Presidente di Fedokarate na Aruba certificando nos hobennan karateka pa referee

ORANJESTAD - Aruba Karate Bond ta sumamente contento y orguyoso di anuncia cu Presidente di Fedokarate, Shihan Jose Ruis Ramirez kende ta un Judge-A WKF ta dunando un curso di referee na nos hobennan karateka faha bruin y preto, cu ta consisti di un parti teorico y un parti practico cu certificacion. Esaki lo significa cu Aruba lo tin por lo menos 25 hoben certifica pa por fungi como referee of judge den futuro. E curso aki lo tuma lugar diahuebs y diabierna awor dianan 5 y 6 di maart 2015. Nos lo tin e placer di wak e hobennan aki den practica diasabra awor dia 7 Maart durante AKB “kick off” campeonato Internacional pa aña 2015 di karate. Aruba Karate Bond ta extende invitacion na pueblo di Aruba riba Diasabra 7 di maart na e prome campeonato di Karate pa aña 2015, cual lo tuma lugar na Stadion Frans Figaroa, Noord. Importante pa menciona cu e aña aki AKB lo aplica un point-system na unda final di aña lo mira cua karateka tin mas punto acumula den e campionatonan y a base di esaki lo por scohe e seleccion pa aña siguiente. Nos ta urgi tur karateka pa participa na tur e campionatonan di aña 2015. E competencia ta cuminsa 9 am pa e categoria di 13 aña bai ariba den fahanan preto y bruin sigui pa e categoria di muchanan edad 4 pa 12. AKB ta invita un y tur pa bin trempan pa bo wak e competencia den comite y kata di nos hobennan. Competencia aki lo dispone di 3 tatami pa facilita cu e campeonato ta bai mas lihe. Un danki grandi ta bai na nos sponsornan Romar Trading, Bright Bakery, Balashi, Frasa Trading y AFMaruba.com y tur otro instancianan cu den un forma of otro a yuda nos cu e curso di referee y e campeonato.