Fila pa test contra Covid19 awe, a blokia entrada pa Compleho di Cinemas Gloria

SASAKI – Awe mainta a surgi un situacion di trafico na altura di e Compleho di Cinema Gloria riba Sasaki, unda cu por papia di blokeo total di entrada pa e Cinema debi na ruta nobo cu hospital a pone pa por test contra Covid19. Ora cu hospital a anuncia e cambionan siman pasa cu e ruta ‘nobo’, esaki inicialmente no a causa un stagnacion na Gloria pasobra trafico a opta pa pasa ‘na banda’ di e caminda. Pero dialuna, e pesadia a bira completo pa e compleho di Cinema ora cu automobilistanan cu nan auto a blokea e entrada pa e Cinema debi na e fila cu a crea. 

BLOKEO

For di siman pasa por corda cu a anuncia un cambio di ruta pa agilisa e trafico pa hende haci test na e laboratorio di hospital. Problema ta cu esaki tabata poni pa afecta e entrada di e Cinema. Pero manera indica caba, esaki no a affecta operacion di e Cinema pasobra automobilistanan a opta pa para na banda, pues lagando trafico pa e Cinema sigui. Sinembargo dialuna mainta, autonan tabata para riba e caminda, segun e ruta inicial stipula, cu no tabata permiti entrada na Cinema, solamente si bin di banda contrario, cu no ta uno recomenda ni propaganda. 

PROBLEMA

For di propietarionan di e compleho di Cine Gloria, e portal aki a compronde cu nan no tabata contento cu e situacion ya cu e ta blokia e pasada completo pa e Compleho. E compleho no solamente ta permiti pa wak pelicula, pero pa e parti culinario tambe e ta strobe e operacion. Tambe pa abastece e Compleho cu mercancia y trabou, esaki a causa un problema logicamente pa e compleho. No ta conoci kico esaki lo nifica den e proximo rato pa e compleho, y si lo por remedia e situacion cu a surgi awe mainta.