Minister kier director di hospital ‘coregi’ declaracion riba vacuna contra Covid19

ORANJESTAD – Declaracionan di director actual di hospital Horacio Oduber Jacco Vroegop tocante vacuna contra Coronavirus no ta na su lugar y incorecto tambe. ASina minister di salud Dangui Oduber a reacciona den fin di siman riba un declaracion di e director, haci den un articulo den e vespertino Amigoe. E mandatario ta pidi e director tambe pa e coregi e declaracionan haci. “Ta mas cu na su lugar pa e expresionan aki wordo corregi pa evita cualkier malcomprondemiento tocante e vacuna” e mandatario ta bisa den su prome reaccion. 

DECLARACION DI VROEGOP

E mandatario a cita e director su declaracion,” “Segun mi, awo ta reconoce ampliamente cu diferente vacuna di Covid-19 ta proteha nos menos contra e infeccionnan di loke tabata pensa anteriormente”. Segun e mandatario, “unstatement haci asina pa un director di hospital no ta na su lugar y ta incorrecto”. E mandatario ta sigura cu e estadisticanan cu e propio director ta comparti cu ministerio di salud ta contradeci su ponencia totalmente y pesey ta incomprendibel con e director di nos hospital cu mester por sa mihor ra expresa su mes di e forma aki. E mandatario ta sigui bisa cu segun e datosnan cu e mes ( Vroegop) a comparti cu ministerio di salud a keda demostra cu di tur esnan cu a wordo hospitalisa sea den e unit di covid of den ICU cu covid-19 desde 1 juli 2021, 80% di nan no tawata vacuna.  “Awor con bo kier bisa cu e vacuna ta proteha nos menos si 80% di esnan interna no tawata vacuna! Acaso e mes no ta tuma nota di e informacion cu e ta comparti cu ministerio di salud? Sigur como minister mi ta lamenta expresionan haci aki y ta mas cu na su lugar pa e expresionan aki wordo corregi pa evita cualkier malcomprondemiento tocante e vacuna” e mandatario ta sigui bisa.

VACUNA TA PROTEHA

E mandatario, cu tabata semper pro pa vacuna y a lidera e campaña di vacuna for di comienso di 2020, a sigura cu como gobierno y minister di salud semper nnan a bisa cu e vacuna ta dunabo e proteccion cu ta evita cu un persona ta corre mas risico di wordo hospitalisa. E vacuna ta minimalisa e risico. “Nunca nos a bisa cu e vacuna ta bai evita cu bo por wordo contagia” Oduber ta continua bisando. “ Tur estudionan haci rond mundo ta mustra cu e vacuna a duna resultado y aki na Aruba tambe esey ta e caso. Nos por mira tambe actualmente cu tanto caso activo na Aruba cu hospital su capacidad ta keda bao di control” e mandatario ta finalisa bisando.

REACCION VROEGOP

E portal aki a acerca e director di hospital pa un reaccion, pero el a mustra cu e ta bin bek riba esaki. E ta actualmente den exterior y ta bolbe Aruba proximamente y dentro di poco lo duna e portal aki un reaccion riba e tema aki,.