Proyecto “Siman di Placa Chikito” pa duna muchanan di Aruba Educacion Financiero

ORANJESTAD - Cuminsando dia 9 di Maart Kiwanis Club of Young Professionals Aruba ta start cu un proyecto hopi importante pa e comunidad di Aruba. Ta trata aki di un programa cu lo educa muchanan di scolnan basico riba e topico di placa. E programa ta hiba e nomber di “Placa Chikito” y lo wordo duna por medio di un curso na muchanan di scolnan basico na Aruba.

BANCO CENTRAL

E iniciativa aki a bini despues cu Banco Central di Aruba a publica cifranan alarmante di e estado financiero di casnan na Aruba. Esaki a hasi cu Kiwanis Club of Young Professionals Aruba a dicidi di inverti den un programa di educacion financiero cu por yuda e muchanan pa ta mihor prepara den futuro ora di anda cu placa.

SIMAN

E siman di placa chikito mes tin como rol tambe pa por crea un concientisacion nacional pa stimula mayornan pa educa nan yiunan riba e topiconan financiero. Por ehempel: Entrada Propio, Spaar, Gasta Placa y Comparti Placa. E forma con lo yega na tanto e muchanan como e mayornan ta pa duna sesionnan cortico na e scolnan basico unda lo educa e muchanan e balor di placa, uso di placa y circulacion di placa. Lo hasi uso di medionan di comunicacion tambe pa yega na e comunidad general.

EHECUCION

Pa por ehecuta e “Siman di Placa Chikito” a ricibi hopi bon colaboracion di e patrocinadornan principal cual ta Aruba Bank, Caribbean Mercantile Bank, ENNIA, RBC Royal Bank. Kiwanis Club of Young Professionals tambe ta hopi agradece na e sosten di Aruba Bankers Association y su Excelencia Gobernador di Aruba kende lo ta efectua e apertura di e “Siman di Placa Chikito”. Kiwanis Club of Young Professionals Aruba ta un club hopi activo yudando comunidad den diferente forma. Durante henter aña Kiwanis Young Professionals Aruba, mihor conoci como KYPA ta organisa diferente proyecto como tambe eventonan pa recauda fondo. E club ta consisti ta professionalnan hoben cu tin e ambicion y curason pa traha pa comunidad. KYPA a yuda diferente fundacion den pasado manera Favi, Fada, Casa Cuna pa menciona algun. E club ta enfoca hopi riba bienestar di nos Muchanan y tambe ta haci ‘Service projects’ y asina ta yuda diferente grupo den nos comunidad.